Túrkııalyq jýrnalıst qazaqtarǵa Anadoly túrikteriniń alǵysyn jetkizdi
«Jýrnalıstıka salasynda qyzmet etkenimen 58 jyl boldy. Osy aralyqta baspalarda qazirgi tsıfrlyq júıelerge deıingi barlyq tehnologııalardy, úı telefonynan bastap telefotoǵa deıingi barlyq sandyq aqparatqa negizdelgen zamanymyzdyń baılanys quraldaryn úırendim. Búgin de jýrnalıstıkanyń máni men baǵyt-baǵdary qatty ózgerdi. Aqparattyq agenttikter men qurylymdar qoǵamdy aqparattandyrýdan góri belgili bir maqsatta yqpal etý úshin jumys isteı bastady. Sondyqtan, táýelsiz jýrnalıstıkanyń jaǵdaıy kún ótken saıyn qıyndap keledi», - dedi Kemal Sally búgin Qazaqstan halqy Assambleıasynyń uıymdastyrýymen elordada ótken «BAQ jáne qoǵamdyq kelisim» forýmynda.
Onyń aıtýynsha, jahandaný kezeńinde, kólik jáne baılanys tehnologııalary damyǵan ýaqytta bolyp jatqan túrli oqıǵalardyń astaryn zertteý kerek.
«Jýrnalıster kez kelgen oqıǵanyń túpki mánine úńilip, oqyrman men kórermenge jetkizý úshin «Sezindirý» operatsııasyn durys júrgizip, tehnologııalardy tolyq ıgerip alýǵa mindetti. Jýrnalıst retinde búgingi tańda oryn alǵan jahandyq jaǵdaılardy basqa qyrynan kórsetýde Qazaqstannyń Tuńǵysh Prezıdenti – Elbasy Nursultan Nazarbaevtyń tájirıbesin tanytý úshin birneshe maqala daıyndadym. Sondaı-aq, dál osy sátti paıdalanyp, Anadoly túrikteriniń atynan alǵys aıtqym keledi. Osydan ǵasyr buryn Túrkııada ulttyq azamattyq soǵys júrip jatqan kezde myńdaǵan shaqyrym qashyqtyqta Maǵjan Jumabaıuly túrikterge arnap, «Alystaǵy baýyryna» sálem joldaǵan bolatyn. Ony eshqashan umytpaımyz. Júz jyldan keıin syndarly saıasat ustanǵan Nursultan Nazarbaevtyń baýyrmaldyǵyn da esh ýaqytta esten shyǵarmaımyz», - dedi ol.