Túrkııalyq jastar qazaq tilin úırenýde

ALMATY. QazAqparat - Túrkııanyń Gıresýn ýnıversıtetinde Eýrazııa zertteýleri magıstratýra baǵdarlamasynda bıyldan bastap qazaq tili páni oqytyla bastady, dep habarlaıdy QazAqparat tilshisi.

Atalǵan pándi engizýdegi basty maqsat - Qazaqstannyń tilin jáne mádenıetin biletin zertteýshiler men keleshek dıplomattaryn tárbıeleý bolyp otyr. Jaqynda Gıresýn ýnıversıtetinde uıymdastyrylǵan baǵdarlamaǵa Túrkııadaǵy QR Elshisi Abzal Saparbekuly arnaıy qatysyp, qazaq tilin úırenip júrgen túrkııalyq jastarǵa qazaq tilinen dáris oqydy. Qazaq tili pánin baǵdarlamaǵa professor, doktor Nursulý Chetın engizgen. Ol osy pánnen stýdentterge dáris oqyp júr.

N.Chetın túrik mádenıetinen jan-jaqty habary bar jáne túrik tilin tolyq meńgergen dıplomattyń Túrkııaǵa elshi bolyp taǵaıyndalýy qazaq halqy men Elbasy Nursultan Nazarbaevtyń Túrkııa eline kórsetken qurmeti ekenin aıtyp ótti.

«Biz osy baǵdarlama men pándi engize otyryp, keleshek zertteýshiler men dıplomattarǵa qazaq tili men qazaq mádenıetin úıretip, keleshekte qazaq-túrik baılanystarynyń damýyna septigin tıgizetin sapaly maman daıarlaýdy maqsat etemiz», - dedi professor Nursulý Chetın.

Stýdentterdiń Qazaqstan týraly oılaryn tyńdaǵan Elshi Abzal Saparbekuly Túrkııada qazaq tili sabaǵynyń oqytylýy ony úlken qýanyshqa bólegenin, osyndaı sharalarǵa árdaıym qoldaý kórsetetinin jáne uıymdastyrylýy úshin járdem beretinin aıtty.

Qazaq tili sabaǵynan keıin Gıresýnde bilim alyp jatqan qazaqstandyq stýdenttermen kezdesken elshi stýdentterdiń ótinishteri men talaptaryn tyńdady.