Túrkııalyq qurylys kompanııalary Ońtústik Qazaqstanǵa ınvestıtsııa salýǵa nıetti
ShYMKENT. QazAqparat - Ońtústik Qazaqstan oblysynyń ákimi J.Túımebaev qurylys salasynda túrli jobalardy iske asyrǵan túrik kompanııalarynyń jetekshilerimen kezdesti.
Ońtústik Qazaqstanǵa ınvestıtsııa salýǵa nıetti «AKAY CONSTRUCTION INC» jáne «MESCIOGLU muhendislik ve musavirlik a.s.» kompanııalary jol qurylysy, turǵyn úı qurylysy salasy men ólsheý aspaptaryn óndirý jáne ózge de óndirister salasynda jumys jasaıdy, dep habarlaıdy OQO ákiminiń baspasóz qyzmeti.
Júzdesý barysynda taraptar qalada turǵyn úı qurylysy salasynda birlesken jobalar qurýdy jáne basqa óndiristik salaǵa túrkııalyq ınvestorlardy tartý jaıyn sóz etti. Sonymen qatar, kompanııa basshylary «Shymkent City» kesheniniń qurylysyna qyzyǵýshylyq tanytyp otyrǵandaryn jetkizdi.
Aıta keteıik, MESCIOGLU kompanııasy 10 jyldan beri Ystanbuldyń avtomobıl joldary men jol qıylystary basqarmasynyń jobalaryn ázirlep, kópir, ótpejol, tonnel jáne avtomobıl joldary jobasynda ınjınırıngtik qyzmetter kórsetip keledi.
Al, 1985 jyly qurylǵan «AKAY CONSTRUCTION INC» qurylys kompanııasy túrli áleýmettik nysandar men ýnıversıtetter, úlken oıyn-saýyq ortalyqtaryn jáne 8300 turǵyn úı kesheni syndy taǵy da basqa ǵımarattar salǵan.
Atalǵan kompanııalar qurylystyń sapasy joǵary ári salynatyn áleýmettik úılerdiń baǵasy tómen bolatyndyǵyn aıtyp otyr.
Sapar barysynda delegattar «Qazaq-túrik» ındýstrıaldy aımaǵynyń jumysymen tanysyp, oblystyń kásipkerlerimen kezdesedi.
