Túrkııalyq kompanııa Túrkistan oblysynda 200 gektar aýmaqqa jylyjaı salady
ASTANA. QazAqparat - Jýyrda Ankarada ótken bıznes forýmda Túrkııanyń kompanııalary men Túrkistan oblysy ákimdigi arasynda yntymaqtastyq jóninde memorandým jasalǵan bolatyn. Osy kelisimge sáıkes, Túrkistan qalasyna Túrkııanyń ataqty «Dal Holding Investment CO» kompanııasynyń Qazaqstan Respýblıkasy boıynsha birinshi basshysy Demırdjan Kýse bastaǵan ókilderi keldi, dep habarlaıdy óńirlik ákimdiktiń baspasóz qyzmeti.
Investorlardy qabyldaǵan oblys ákimi Janseıit Túımebaev kompanııa basshylarynyń Túrkistandy damytý baǵytyndaǵy usynystaryna qoldaý kórsetýge daıyn ekenin aıtty.
"Túrkistan qalasynyń qazaq halqy úshin, búkil Túrki álemi úshin asa mańyzdy qala ekenin bilesizder. Elbasymyzdyń Jarlyǵyna sáıkes, Túrkistan oblysy qurylyp, onyń ortalyǵy bolyp Túrkistan qalasy bekitildi. Sizderdiń kompanııalaryńyzdyń jetistikterinen habardarmyn. Birneshe baǵytta áriptestik ornatyp, birlesip jumys isteýge múmkindigimiz bar", - dedi oblys ákimi.
Óz kezeginde Demırdjan Kýse qazirdiń ózinde naqty jobamen kelgenin, oblyspen tanysý barysynda ózge de jobalardy qarjylandyrýǵa ázir ekenin málimdedi. Atap aıtsaq, «Dal Holding Investment CO» kompanııasy jaqynda Kentaý qalasynda 200 gektar aýmaqqa zaman talabyna saı jylyjaı keshenin salýdy bastamaq. Quny 500 mln. AQSh dollary bolatyn joba arqyly 3000 jumys orny ashylmaq. Bul jylyjaı «Batys Eýropa-Batys Qytaı» halyqaralyq kólik dálizine 25 shaqyrym jerdegi ındýstrıaldy aımaqta ornalasady. Kentaýdaǵy jylyjaı kesheni aýyl sharýashylyq ónimderin molaıyp, elimizdiń eksporttyq áleýetin kóteredi degen boljam bar.
33 jyldan beri jumys istep kele jatqan bul kompanııa Ońtústik Amerıka, Afrıka, Qıyr jáne Taıaý Shyǵys pen Orta Azııada túrli jobalardy júzege asyrǵan. Álemniń túkpir-túkpirinde 2000 ókili bar. Kompanııa tsement shyǵarý, taý kenin óndirý, mashına jasaý, avtomattandyrý, óndiristik shań-tozańdardy jınaıtyn qurylǵy jasaý jáne energetıka salasynda joǵary deńgeıli kásiporyndar salýmen de aınalysady.
