Túrkııalyq kompanııa Qyzylordada keramıka óndirisin qolǵa alýy múmkin
QYZYLORDA. QazAqparat - Qyzylorda oblysynyń ákimi Qyrymbek Kósherbaev Túrkııa eliniń «Yildizlar SSS Holding» kompanııasynyń basshysy Sebahattın Iyldyzdy qabyldady. Kezdesýde birqatar máseleler boıynsha birlesip qyzmet etýdiń joldary qaraldy,-dep habarlady QazAqparat tilshisi.
Qazirgi tańda óńirdegi elektr energııasynyń tapshylyǵy shamamen 200 Mvt-ty quraıdy. Soǵan sáıkes gaztýrbınalyq elektr stantsııasyn salý qajettigi týyndap otyr. Oblys ákimi túrkııalyq kompanııa basshysymen kezdesýde atalǵan máseleni de sóz etti. Qurylys jumystary úshin barlyq qolaıly jaǵdaı jasalatynyn jetkizdi.
Sondaı-aq, aımaqta keramıka óndirisin damytý da nazarǵa alyndy. Elimizde keramıkalyq plıta shyǵarýǵa qajetti shıkizattyń 90 paıyzy bar. Qazirgi tańda ishki naryqqa qajetti 22-24 mln sharshy metr ónimniń tek 2 mln-nyn ǵana shyǵarýdamyz. Qalǵan 90 paıyzǵa jýyǵy syrttan ákelinedi. Sondyqtan atalǵan kásiporyndy salý elimiz úshin de paıdaly bolmaq. Eger joba iske assa, 500 jańa jumys orny ashylady.
«Yildizlar SSS Holding» kompanııasy birneshe baǵytta jumys júrgizetin, tek óz elinde ǵana emes, álem boıynsha da beldi óndiris oryndarynyń biri. Túrkııa naryǵyndaǵy keramıka men keramogranıt óndirisiniń jartysy osy kompanııanyń enshisinde. Sondaı-aq, metall ónimderin eksporttaý boıynsha da tanymal. Búginde kúmis pen altyn óńdeý boıynsha da aldyńǵy qatarda. Sondyqtan atalǵan holdıngpen birlesip jumys jasaý eki jaq úshin de tıimdi bolmaq.
Kompanııa basshysy Sebahattın Iyldyz Syr óńirindegi múmkindikterdi tilge tıek etip, bolashaqta birlesken jobalardy júzege asyrýǵa yntaly ekenin jetkizdi. Sondaı-aq, aldaǵy ýaqytta kompanııa tarapynan arnaıy mamandar kelip, óńirde geologııalyq zertteý jumystaryn júrgizbek.
