Túrkııalyq kásipker árbir qyzmetkerine 200 myń dollardan syıaqy taratty

Kásipkerdiń osynsha myrzalyq tanytyp, qyzmetkerlerge qomaqty syıaqy tóleýiniń qupııasy nede? Túrkııadaǵy Yemeksepeti tamaqqa tapsyrys berý qyzmetiniń basshysy Nevzat Aıdyn dóńgeletip otyrǵan bıznesin satyp jiberdi. Kásipker qaramaǵynda jumys istegen 114 adamnyń árbirine anaý-mynaý emes 200 myń dollardan syıaqy tólepti, dep habarlaıdy epochtimes.ru.

27 mıllıon dollardy jurtqa taratqan Aıdynnyń ózi nemistiń Delivery Hero kompanııasyna bıznesin satýdan $589 mıllıon paıda kórgen eken. Al ol ózin «myrzalyq tanyttym» dep sanamaıtyn kórinedi. Tabysty startaptyń bas dırektory mundaı kiriske ujymnyń júkti jumyla kóterýiniń arqasynda jetkenin aıtady. Osy rette Aıdyn myrzanyń ózi bylaı depti: «Syıaqyny alǵan kezde adamdar qýanǵannan kóz jastaryna erik berip, aıqaılap, barlyq emotsııalaryn syrtqa shyǵaryp jatty. Keıbirleri maǵan alǵys hat jazdy. Men olardy tolyǵymen túsinemin. Sebebi endi olar armandaǵan nárseleriniń bárin satyp ala alady. Al burynǵy 5 myń lıralyq jalaqy bolsa, eshteńege jetpeı tıtyqtaıtyn edi. Men adamdarǵa bergen ústine bere túskim keledi».

Bir qyzyǵy, Yemeksepeti qyzmeti satylǵan jaǵdaıda onyń qyzmetkerler aldynda eshbir mindettemesi bolmaǵan eken. Jalpy kásipkerdiń ujymǵa munsha syıaqy tóleýi Túrkııa tarıhynda eń alǵash ret bolǵan jáıt. Yemeksepeti - túrik jerindegi tamaq jetkizýdiń eń iri servısi. Tapsyrys 30-45 mınýtta jetkiziledi, dep jazady 24.kz.