Túrkııalyq basylym: «Astana» klýby Tvýması úshin qosymsha aqsha surap otyr
ASTANA. QazAqparat - Túrkııalyq EnBursa.com saıty «Astana» men «Býrsaspor» fýtbol komandalary arasyndaǵy Patrık Tvýmasıdiń transferi boıynsha sońǵy kelissózderdiń qarjy qupııasyn ashty, dep habarlaıdy QazAqparat prosports.kz saıtyna silteme jasap.
Basylymnyń habarlaýynsha, túrkııalyq klýb «Astana» klýbynyń shabýylshysy Patrık Tvýması úshin 1,5 mıllıon eýro usynýda. Al «Astana» ústine taǵy 250 myń eýro surap otyr.
Buǵan deıin elordalyq klýbtyń prezıdenti Saıan Hamıtjanov Tvýmasıdi az aqshaǵa jibermeıtinin málimdegen bolatyn.
«Qazirgi tańda Tvýması «Astana» oıynshysy, onyń kelisimsharty áli kúshin joıǵan joq. Árıne, jelidegi aqparatty únemi qadaǵalap otyramyz. Alaıda ol shyndyqqa janaspaıdy. Dálirek aıtsaq, bizde naqty eki usynys bolǵan. Biraq olar bizdi qanaǵattandyratyn qarajat usynbady. Tvýmasıdi mınımaldy somaǵa jiberýdiń máni joq. Odan da Patrıkti komandada qaldyryp, Eýropa lıgasynyń 1/16 fınalynda abyroımen óner kórsetkenimiz durys. Sonymen qatar, 2018/19 jylǵy Chempıondar lıgasynda barlyq Qazaqstandaǵy jankúıerlerimizdi qýantqymyz keledi», - dedi Hamıtjanov.
