Túrkııalyq BAQ ókilderi Úkasha ata qudyǵy mańynda bozarsha ekti
«Áziret Sultan» memlekettik tarıhı-mádenı qoryq-mýzeıiniń dırektory Nurbolat Ahmetjanov jáne Túrkııanyń eń iri medıa holdıngi «TRT» memlekettik teleradıo korporatsııasynyń Qazaqstandaǵy ókili Mehmed Zahıd Chalyshkan men telearna tilshisi Gúzal Saıtova Úkasha ata qudyǵy mańynda arsha tuqymdas týıa aǵashyn ekti.
Qurǵaq jáne ystyq klımatqa jáne kún sáýlesine tózimdi bozarsha - ómir aǵashy dep atalatyny belgili.
Úkasha ata kesenesinde quran baǵyshtap, qudyǵynan sý ishken tatqan túrkııalyq BAQ ókilderi tarıhı oryndy alys-jaqyn shet el týrısteriniń de nazaryna usynýǵa laıyq birden-bir obekt ekenin jetkizdi.
Aıta ketsek, «Áziret Sultan» memlekettik tarıhı-mádenı qoryq-mýzeıine qarasty respýblıkalyq mańyzy bar eskertkishter qataryna kiretin Úkasha ata kesenesi men qudyǵynda sońǵy jyldary jańa jobalar men abattandyrý jumystary jasalyp jatyr. Byltyr Úkasha ata kesenesi men qudyǵynyń aınalasy tazartylyp, oryndyqtar qaıta jasaldy. Avtoturaqqa jańadan elektr shamdary tartylyp, jaryqtandyryldy.
Zııaratshylar demalatyn oryndar halyq ıgiligine berildi. Sondaı-aq, mýzeılendirý jumystary boıynsha «Úkasha ata tarıhy» mýzeıi kelýshilerge esigin aıqara ashty.
Mýzeı ekspozıtsııasyna Úkasha sahabanyń ómirinen syr shertetin qundy málimetter men 70-ten astam arheologııalyq, etnografııalyq, jazba mádenıetine qatysty jádiger qoıyldy. Zııaratshylardyń ótinishterin qanaǵattandyrý maqsatynda, otyn, sý qoıatyn úlken bastyrma jasalyp, halyq ıgiligine berildi. Baba basyna baratyn júrginshi joldar qaıta jóndeldi. Qudyqqa kóteriletin jolǵa múgedekterge arnalǵan arnaıy jol salyp, pandýs ornatyldy. Tazalyq jumystaryna baılanysty arnaıy qaldyq jáshikter men eskertý taqtaıshalary qoıylyp, Úkasha ata kesenesi mańyna 100-den astam máýe aǵashy men shyrsha jáne gúlder otyrǵyzylǵan bolatyn.
«Áziret Sultan» memlekettik tarıhı-mádenı qoryq-mýzeıi qabyldaǵan 2018-2021 jyldarǵan arnalǵan damý josparyna sáıkes tarıhı oryndardy abattandyrý, kelgen týrıster men zııaratshylarǵa sapaly qyzmet kórsetý boıynsha birqatar jumystar demeýshilerdi tarta otyryp júzege asýda.
