Túrkııalyq Plan-S tórt IoT-spýtnıgin orbıtaǵa shyǵardy
ASTANA. KAZINFORM — Túrkııalyq Plan-S kompanııasy tórt jańa IoT-spýtnıgin orbıtaǵa shyǵaryp, ǵalamdyq ınternet jelisi (IoT) qamtýyn keńeıtýge qadam jasady, dep habarlaıdy Kazinform agenttiginiń menshikti tilshisi.
Ǵalamdyq IoT qamtý – IoT qurylǵylaryn ornalasqan jerine qaramastan, qashyqtaǵy nemese qoljetimsiz aýmaqtardy qosa alǵanda, búkil álem boıynsha qosýǵa jáne basqarýǵa múmkindik beredi. Bul jerústi ınfraqurylymǵa táýeldi bolmaı, qurylǵylar men bulttyq platformalar arasyndaǵy derekterdiń úzdiksiz berilýin qamtamasyz etetin spýtnıktik baılanys arqyly júzege asady.
Túrkııanyń Plan-S aeroǵarysh kompanııasy ǵalamdyq ınternet zattar jelisin qurý jolynda taǵy bir mańyzdy qadam jasap, tórt jańa spýtnıkti sátti ushyrdy. Ushyrylym SpaceX kompanııasynyń Falcon 9 zymyran tasyǵyshy arqyly Transporter-14 mıssııasy aıasynda júzege asty. Nátıjesinde Plan-S kompanııasynyń belsendi spýtnıkteriniń jalpy sany 17-ge jetti, onyń ishinde 12-si kommertsııalyq maqsatta qoldanylady.
Atalǵan spýtnıkter IoT qurylǵylarynan derekterdi naqty ýaqyt rejıminde jınaýǵa arnalǵan, bul jer sharyn tolyq qamtýdy qamtamasyz etedi. Kompanııa energetıka, aýyl sharýashylyǵy, logıstıka jáne ınfraqurylym sııaqty salalarǵa qyzmet usynyp, kásiporyndarǵa mıllıondaǵan qosylǵan qurylǵylardy tıimdi basqarýǵa kómektesedi.
Plan-S tez damyp kele jatqan ǵaryshtyq IoT sektorynyń bolashaǵyna senim artyp otyr jáne 2030 jylǵa deıin júzdegen spýtnıkti orbıtaǵa shyǵarýdy josparlap otyr. Bul aýqymdy jospar kompanııany halyqaralyq deńgeıde ǵaryshtyq IoT baılanysy salasyndaǵy negizgi oıynshylardyń birine aınaldyrady.
Plan-S spýtnıkter tobynyń damýy ekonomıkanyń negizgi salalaryn tsıfrlandyrýdy jedeldetip qana qoımaı, jahandyq jetkizý tizbekteri men ınfraqurylymdyq júıelerdiń turaqtylyǵy men tıimdiligin arttyrýǵa yqpal etedi.
Buǵan deıin biz Transporter-12 mıssııasy aıasynda SpaceX kompanııasynyń Falcon 9 zymyran tasyǵyshy túrkııalyq Fergani Space kompanııasynyń alǵashqy FGN-100-d1 spýtnıgin orbıtaǵa sátti shyǵarǵanyn habarlaǵan edik.
Sondaı-aq jaqynda alǵashqy otandyq Türksat 6A baılanys spýtnıgi iske qosyldy.