Túrkııalyq oppozıtsıoner Erdoǵanǵa til tıgizgeni úshin moraldyq ótemaqy tóleıdi
ASTANA. KAZINFORM — Ankara soty oppozıtsııa lıderi Ózgúr Ózeldi Túrkııa prezıdenti Rejep Taııp Erdoǵanǵa onyń atyna aıtqan jarııa málimdemeleri úshin ótemaqy tóleýge mindettedi, dep habarlaıdy Ankaradaǵy Kazinform agenttiginiń menshikti tilshisi.
Túrkııalyq NTV basylymynyń jazýynsha, Ankaranyń birinshi satydaǵy azamattyq ister jónindegi № 44 soty Túrkııa prezıdenti Rejep Taııp Erdoǵannyń oppozıtsııalyq «Jańa partııa» (túrikshe — Yeni parti) lıderi Ózgúr Ózelge qarsy bergen talap aryzy boıynsha sheshim shyǵarǵan.
Sot sheshimi týraly prezıdenttiń advokaty Húseıın Aıdyn habarlady. Onyń aıtýynsha, ótemaqy Ózeldiń Erdoǵanǵa qatysty aıtqan málimdemeleri men qorlaıtyn sózderi úshin belgilengen.
Sot oppozıtsıonerdiń sózderin Túrkııa prezıdentiniń jeke quqyqtaryn buzdy dep tanyp, odan Erdoǵannyń paıdasyna moraldyq ótemaqy retinde 800 myń túrik lırasyn (16,5 myń dollardan astam) óndirip alý týraly sheshim shyǵardy.
Sot sheshimi oppozıtsııalyq saıasatkerdiń 2025 jylǵy tamyzda jasaǵan úsh málimdemesine qatysty.
13 tamyzda «Marmara» túrmesinen shyqqannan keıin sóılegen sózi úshin Ózelden 200 myń lıra óndirilmek.
Sonymen qatar sol kúni Ystambuldyń Baırampasha aýdanynda ótken mıtıngidegi sózi úshin taǵy 300 myń lıra tóleýge mindetteldi.
Al 2025 jylǵy 18 tamyzda Aıdyn provıntsııasyndaǵy mıtıngte sóılegen sózi úshin sot Erdoǵannyń paıdasyna qosymsha 300 myń lıra óndirip alý týraly sheshim shyǵardy.
Eske salaıyq, buǵan deıin Túrkııanyń Aıdyn qalasynda áleýmettik jelide el prezıdenti Rejep Taııp Erdoǵannyń baqılyq bolǵany týraly habarlama jarııalanǵannan keıin prokýratýra tergeý bastaǵanyn habarlaǵan edik.
