Túrkııalyq qor Ramazan aıynda 66 eldegi 3 mıllıon adamǵa kómek kórsetedi
ASTANA. KAZINFORM — Túrkııanyń «Adam quqyqtary men bostandyqtary» gýmanıtarlyq kómek qory (İHH) musylmandar úshin qasıetti Ramazan aıynda álemniń 66 elindegi 3 mıllıon adamǵa kómek kórsetýdi josparlap otyr. Bul týraly İHH qorynyń baspasóz habarlamasynda aıtylǵan.
Habarlamaǵa sáıkes, aktsııa «Ramazan: baýyrlastyqqa úndeý» uranymen ótedi.
Kómek Túrkııadaǵy muqtaj otbasylarǵa, sondaı-aq Afrıka, Azııa, Taıaý Shyǵys, Eýropa jáne Ońtústik Amerıka elderindegi muqtaj jandarǵa kórsetiledi. Azyq-túlik jáne syılyq jıyntyqtary qarýly qaqtyǵystar men aýyr daǵdarystardy bastan ótkerip jatqan elderdiń turǵyndaryna da jetkiziledi. Olardyń qatarynda Palestına, Sırııa, Sýdan jáne Lıvan bar.
Qaıyrymdylyq jasaýshylar İHH uıymdastyryp otyrǵan naýqanǵa SMS arqyly qosylyp, Túrkııadaǵy jáne álemniń túkpir-túkpirindegi muqtaj musylmandarǵa zeket, pitir sadaqa, sadaqa jáne azyq-túlik jıyntyqtaryn sadaqa retinde joldaı alady.
Aıta keteıik, byltyr brıtandyq belsendi Rýt Gerbert Ulybrıtanııadan Túrkııanyń Ystambul qalasyna deıin jaıaý júrip, Medical Aid for Palestinians («Palestınalyqtarǵa medıtsınalyq kómek») uıymyna qaıyrymdylyq qarajatyn jınady.