Túrkııalyq kompanııa otandyq agrojobalarǵa 160 mlrd teńge ınvestıtsııa quımaq

ASTANA. KAZINFORM — Qazaqstan men Túrkııa arasynda 2018 jyldan beri 23 ınvestıtsııalyq joba iske asyrylyp jatyr. Bul týraly Aýyl sharýashylyǵy mınıstri Aıdarbek Saparov málim etti.

— Qazaqstan men Túrkııa arasyndaǵy aýyl sharýashylyǵy salasy boıynsha yntymaqtastyq jyldan jylǵa nyǵaıyp jatyr. Taýar aınalymy 300 mln AQSh dollaryn quraıdy. Bul jumysty odan ári kúsheıtip jalǵastyramyz, óıtkeni rezerv áli de bar, — dedi Aıdarbek Saparov.

Mınıstrdiń málimdeýinshe, 2018 jyldan beri eki el arasynda 23 ınvestıtsııalyq joba qolǵa alynǵan, sonyń 18-i iske qosyldy, 5-i iske qosý barysynda.

— Búgin Tiryaki Holding kompanııasy basshylyǵymen kezdesý ótti. Bizde bıdaı kóp óndiriledi, ony tıimdi eksporttaý úshin Astanada bıdaıdy tereń óńdeý zaýytyn ashpaqshymyz. Sol jobaǵa 160 mlrd teńge ınvestıtsııa quıylady, alǵashynda 110 mlrd teńge tartylady, ekinshi kezeńde 50 mlrd teńge. Bul jerde bıdaımen qatar burshaq ónimderi tereń óńdeledi. Bizde SQO-da bir ǵana zaýyt bar, mynaý ekinshi zaýyt bolady. Basqa óńirlerge kelsek, Qostanaı jáne Aqmola oblysynda joba jalǵasady. Bıdaı óndirisi ósip jatyr, eksporttaýǵa jolymyz jaqsy ashylady dep oılaımyz, — dep tolyqtyrdy vedomstvo basshysy.

Aıta keteıik, qazir Memleket basshysy Qasym-Jomart Toqaev Túrkııada resmı saparmen júr. Búgin Prezıdent S Sistem Lojistik kompanııasynyń basqarma tóraǵasymen kezdesti. 

Sondaı-aq Memleket basshysy sapar barysynda YDA Holding basqarma tóraǵasy Hýseın Arslandy qabyldady.