Túrkııalyq kınokompanııa Joshy han týraly serıaldy tek qana Qazaqstanda túsiretin boldy
ASTANA. KAZINFORM – 14 qańtarda Ystambuldaǵy Karga Seven Pictures kınokompanııasynyń keńsesinde shartty ataýy «Altyn ımperııa» jobasy boıynsha shyǵarmashylyq toptyń otyrysy ótti.
Kezdesýge Qazaqstannyń Memlekettik keńesshisi Erlan Qarın, Karga Seven Pictures kompanııasynyń teń quryltaıshylary Emre Sahın men Fıkret Manoglý qatysyp, serıaldyń 6 epızodynyń stsenarııleri men basty rólderge akterlik quramyn bekitti.
Aıta keteıik, 4 000-nan astam ótinimniń ishinen 350 akter iriktelip alyndy. Olardyń arasynda 250 qazaqstandyq jáne Shvetsııa, Belgııa, Anglııa, Germanııa, AQSh, Mońǵolııa elderinen 100 ártis bar. Oǵan qosa, kezdesýde kostıýmder, dekoratsııalar men rekvızıtter tanystyrylǵan.
Buǵan deıin Qazaqstanda serıal túsiriliminiń tek 40%-y ótedi dep josparlanǵan edi. Alaıda serıaldyń bas prodıýseri jáne rejısseri Emre Sahın lokatsııalardy jan-jaqty zerttegen soń, túsirilimdi tolyǵymen Qazaqstanǵa kóshirýdi uıǵarǵan. Túsirilim jumystary 2025 jyldyń aqpanynda bastalady.
Sonymen birge, kastıngtiń ekinshi kezeńin ótkizý josparlanyp otyr. Bul ekinshi plandaǵy jáne balalar rólderine arnalmaq.
«Dara» Prezıdenttik bastamalar qory júzege asyryp jatqan jáne Joshy han ulysynyń 800 jyldyǵyna oraılastyrylǵan «Altyn orda» serıalynyń stsenarııin ázirleýge Djastın Pollard («Vıkıngter»), Kler Mýrsom («Zańnan tys patsha») sııaqty tanymal stsenarıster, sondaı-aq qazaqstandyq jáne halyqaralyq tarıhshylar men sarapshylar qatysqan.
Serıal avtorlary Joshy ulysynyń, Altyn Ordanyń tarıhyna, kóshpeli halyqtar men qazaqtyń mádenı qundylyqtary men ómir saltyna zertteý júrgizgen.
Altyn ordanyń tarıhy halyqaralyq aýdıtorııa men dıstrıbıýtorlardyń úlken qyzyǵýshylyǵyn týdyryp otyr. Jańa serıal álem kórermenderiniń nazaryn aýdaratyn aýqymdy joba bola alady.
Buǵan deıin Joshy han týraly serıalǵa kastıng júrip jatqanyn habarlaǵan edik.
Sondaı-aq, Kazinform agenttigi Joshy han týraly Ǵylymı ınstıtýttyń kishi ǵylymı qyzmetkeri Ábilbek Qarataevpen suhbat jarııalady.
