Túrkııaǵa zańsyz 190 kg altyn tasymaldaǵan transulttyq uıymdasqan top basshysy 11 jylǵa sottaldy
ASTANA. KAZINFORM – Astana qalasynyń qylmystyq ister jónindegi mamandandyrylǵan aýdanaralyq sotynda sottalýshylar transulttyq uıymdasqan topty quryp, oǵan basshylyq etý, qatysý, qylmystyq toptyń quramynda adamdar tobynyń aldyn ala sóz baılasýymen birneshe ret asa iri mólsherde deklaratsııalanbaǵan, ótkizýge tyıym salynǵan taýarlardy Eýrazııalyq ekonomıkalyq odaqtyń kedendik shekarasy arqyly ótkizý boıynsha úsh adamǵa qatysty isti qarady.
2016 jyly eki aıyptalýshy Qazaqstan Respýblıkasynan Túrkııaǵa baǵaly metal — altynnyń zańsyz aınalymy men tasymaldaý úshin transulttyq uıymdasqan topty quryp jáne oǵan basshylyq etken.
Olar qylmystyq toptyń quramyna ózderiniń tanystary men týystaryn, onyń ishinde úshinshi aıyptalýshy tulǵany tartqan.
«Óz kezeginde Túrkııa Respýblıkasyndaǵy transulttyq uıymdasqan toptyń basshysy qylmystyq topqa osy eldiń azamattaryn qosqan. Top basshylary óz nıetterin júzege asyrý úshin 2020 jyly baǵaly altyndy tasymaldaý úshin Túrkııa azamatyn jetkizýshi retinde paıdalanǵan. Sottalýshylar kedendik shekara arqyly kedendik baqylaýdan tys ótkizýge tyıym salynǵan baǵaly metaldar — altyn men zergerlik buıymdardy birneshe ret zańsyz alyp ótip, kontarabandalyq tasymal jasaǵan», — delingen sottyń habarlamasynda.
Nátıjesinde, 2017-2021 jyldar aralyǵynda 19 epızod boıynsha Qazaqstan Respýblıkasynan Túrkııaǵa zańsyz túrde jalpy quny 5 mlrd teńgege jýyq baǵalanǵan salmaǵy 190 kg-dan joǵary altyn tasymaldanǵan.
Sottalýshylardyń kinási kýálerdiń jaýaptarymen, saraptama qorytyndylarymen jáne is materıaldaryndaǵy dáleldermen rastaldy.
Sot úkimimen transulttyq uıymdasqan topqa basshylyq jasaǵan aıyptalýshy kináli dep tanylyp, oǵan 11 jyl, ekinshi aıyptalýshyǵa túpkilikti 8 jyl merzim, sondaı-aq úshinshi tulǵaǵa 1 jyl 6 aı merzim bas bostandyǵynan aıyrý jazasy kesildi.
Úkim zańdy kúshine engen joq.
Eske sala keteıik, buǵan deıin Qyzylordada qarjy pıramıdasyn qurǵan azamatsha 5 jylǵa sottalǵanyn jazǵan bolatynbyz.
