Túrkııaǵa ushatyn reıs sany azaıtylady – mınıstr

NUR-SULTAN. QazAqparat – 5 qazannan bastap áýe qatynasy jańartylǵan barlyq elderge áýe qatynasyn toqtatý jáne reıs sanyn kóbeıtpeý, Túrkııaǵa ushatyn reıs sanyn azaıtý týraly sheshim qabyldandy. Bul týraly Ortalyq kommýnıkatsııalar qyzmeti alańynda «QR DSM ózekti máseleleri: Pandemııa kezindegi medıtsınalyq kómektiń qol jetimdiligi týraly» taqyrypta ótken onlaın brıfıngide aıtyldy, dep habarlaıdy QazAqparat tilshisi.

«Qazirgi tańda elimizde koronavırýs ınfektsııasymen aýyrǵandar boıynsha epıdemılogııalyq jaǵdaı turaqtaldy. Qazirgi kezde aýyrǵan adamdar sany – 17 979, sońǵy táýlikte 71 adamnyń aýyrǵany PTR test arqyly anyqtaldy. 3308 adam em alyp jatsa, 102 938 nemese 95,3% adam emdelip shyqty. 1734 adam osy dertten kóz kóz jumdy. Sondaı-aq, elimizde tamyz aıynyń basynan bastap koronavırýspen aýyrǵan bolýy múmkin 303 000-ge jýyq adam tirkelse, onyń 305-i kóz jumdy «, - deıdi QR Densaýlyq saqtaý mınıstri Alekseı Tsoı.

Ol elimizde epıdemıologııalyq jaǵdaı turaqty bolǵanmen, basqa memleketterde jaǵdaı nasharlap bara jatqanyn aıtty.

«Qazaqstanǵa ınfektsııa ákelýdiń aldyn alý maqsatynda vedomstvoaralyq komıssııa bıyl 5 qazannan bastap áýe qatynasy jańartylǵan barlyq elderge áýe qatynasyn toqtatý jáne reıs sanyn kóbeıtpeý, Túrkııaǵa ushatyn reıs sanyn azaıtý, ekinshi sanattaǵy elderden ushyp kelgen tulǵalardan anketa toltyrý, termometrııadan ótý jáne Covid-19-ben aýyrmaıtyny týraly anyqtama talap etiletini týraly sheshim qabyldady. Ol anyqtama úsh kúnge jaramdy. Anyqtama bolmaǵan jaǵdaıda Qazaqstanǵa ushyp kelgen jolaýshy karantındik statsıonarǵa 2 kúnge oqshaýlanady. Ol jerde laboratorııalyq tekseristen ótken kezde aýrý juqtyrǵany anyqtalǵan adam ınfektsııalyq aýrýhanaǵa jatqyzylady. EAEO quramyna kiretin elder men Ózbekstannyń memlekettik shekarasynan ótetin pýnkterde de osyndaı talaptar qoıylady», - deıdi ol.