Túrkııaǵa shamamen 227 myń tonna qazaqstandyq jasymyq eksporttaldy
ASTANA. KAZINFORM – Mersın qalasynda ótken AgroFood Summit 2025 agrarlyq konferentsııasy aıasynda «Azyq-túlik kelisimshart korporatsııasy» UK» AQ men Túrik astyq basqarmasy (TMO) ókilderi arasynda aýyl sharýashylyǵy salasyndaǵy strategııalyq áriptestikti nyǵaıtýǵa baǵyttalǵan kelissózder ótti.
Túrkııa jasymyq ımportynda jetekshi oryn alyp otyr. 2024 jyly elge 141 myń tonna jasymyq jetkizilse, 2025 jyldyń alǵashqy toǵyz aıynda bul kórsetkish 226,8 myń tonnaǵa deıin ósti.
Kezdesý barysynda taraptar qazaqstandyq jasymyqtyń joǵary sapasy, turaqty jetkizilimderi jáne tıimdi logıstıkalyq tizbekteri onyń suranysyn arttyryp otyrǵanyn atap ótti.
«Qazaqstan egis alańdaryn ártaraptandyrý baǵytyn júıeli túrde jalǵastyrýda, jáne onyń naqty nátıjeleri búginde aıqyn baıqalady. 2025 jyly dándi-burshaq daqyldarynyń jalpy ónimi alǵash ret 1 mln tonnadan asyp, onyń 80 paıyzy jasymyq boldy. Azyq-túlik kelisimshart korporatsııasy TMO suranysyna sáıkes uzaq merzimdi kelisimder aıasynda azyqtyq bıdaıdy, dándi-burshaq jáne maıly daqyldardyń keń suryptalymyn jetkizýge ázir», – dedi korporatsııa tóraǵasynyń birinshi orynbasary Ildar Ismagýlov.
Kelissózder barysynda taraptar qorlardy basqarý, naryqty retteý, satyp alý kampanııalaryn júrgizý jáne eksporttyq jetkizilimderdi uıymdastyrý máseleleri boıynsha tájirıbe almasty.
Túrik memlekettik astyq basqarmasy (TMO) Azyq-túlik kelisimshart korporatsııasynyń qyzmetine uqsas fýnktsııalardy oryndaıdy. TMO astyq óndirisin qarjylandyrýmen, memlekettik rezervke bıdaı satyp alýmen jáne ishki naryqta turaqty baǵany ustap turýmen aınalysady.
Aıta keteıik, elimizdiń aýyl sharýashylyǵy ónimderi 15-ten asa elge eksporttalady.