Túrkııaǵa saqtandyrýsyz saparlaǵanymyz durys bolmady - Almagúl Nurasylova
TALDYQORǴAN. QazAqparat - Túrkııada kólik apatyna túsken qazaqstandyqtar Elbasyǵa alǵys hat joldaýǵa nıetti. Olar elge aman oralýyna bar múmkinshilikterdi qarastyrǵan bılik ókilderinen bastap, jýrnalıster qaýymyna da dán rıza. Bul týraly QazAqparat tilshisimen suhbattasqan erli-zaıypty Nursultan Orynbasarov pen Almagúl Nurasylova aıtty, dep habarlaıdy QazAqparat tilshisi.
Qazirgi tańda jas jubaılardyń jaǵdaılary qalypty. Olar dúısenbi kúni Almatydaǵy aýrýhanadan Taldyqorǵandaǵy kópsalaly aýrýhanaǵa aýystyryldy. Polıtravma bóliminde jatqan naýqastar aq halattylardyń jiti baqylaýynda.
«Túrkııada Nurasylovanyń oń jaq ıyǵyna, sol jaq bilegine ota jasaǵan. Sonymen qatar ol bas-mı jaraqatyn alǵan. Al Orynbasarovtyń jambas, sol jaq ortan jiliginiń urshyq basy synyp, sol jaqta operatsııa jasalǵan. Barlyq otalar standartqa sáıkes júzege asqan. Endi osy eki naýqas bir-eki apta reabılıtatsııalyq kezeńnen ótedi. Keshe túse salǵannan keıin búkil analızderin aldyq. Klınıkalyq zertteýler júrgizdik. Barlyǵy turaqty. Búginnen bastap reabılıtatsııadan ótýde», - dedi Taldyqorǵan qalalyq kópsalaly aýrýhanasynyń polıtravma bóliminiń meńgerýshisi Anarbek Mońǵol.
Nursultan men Almagúldiń aıtýynsha, olar Túrkııada bal aıyn atap ótpek bolǵan. Qyrkúıektiń basynda ǵana shańyraq kótergen jastar ózge elge ne sebepti saqtandyrý qujatynsyz barǵandaryn aıta almaýda. Ol qujattyń mańyzy zor ekendigin de bilmegen.
«Shynymyzdy aıtsaq, ol saqtandyrý qujaty jaıly oılamadyq. Biz Túrkııaǵa óz kúshimizben saparlap bardyq. Shynymen, saqtandyrýsyz barǵanymyz durys bolmady. Ol kinámizdi moıyndaımyz. Negizinde bizge elimiz osyndaı deńgeıde kómek qolyn sozady dep oılamadyq. Qıyn sátte bizdiń jaǵdaıymyzǵa beı-jáı qaramaǵan, qol ushyn sozyp, biz úshin alań bolǵan bılik ókilderinen bastap, jýrnalıster qaýymyna, halqymyzǵa bárine alǵysymyz sheksiz. Rızashylyǵymyzdy bildirý úshin Elbasyǵa alǵys hat joldasaq dep nıettenip otyrmyz», - deıdi erli-zaıypty jastar.
Nursultan men Almagúl Taldyqorǵanda bir synypta birge oqyp, 8 jyl boıy qyz ben jigit bolyp júrip qosylǵandaryn aıtady. Olar sol kúngi jantúrshigerlik kólik apatyn umytqylary keledi. Sol sebepti de BAQ ókilderiniń ózderin mazalaǵanyn qalamaıdy.
«Túriktiń taksı júrgizýshisi bizdi aman alyp qaldy. Eger sol kúngi kólikte basqa adam bolsa bizdiń jaǵdaıymyzdyń qalaı bolatyny da belgisiz. Biz osy jaıly Túrkııanyń BAQ ókilderi arqyly da aıttyq. Shynymdy aıtsam, ózim kólik apatyna túsken sátti bilmeımin. Esimde eshteńe joq. Aýrýhanaǵa es-tússiz jetippin. Qorqynyshty tús sııaqty. Tipti alǵashqyda bizge dárigerler tórt dosymyzdyń qaıtys bolǵanyn aıtty. Záremiz ushty. Qaıtys bolǵan túriktiń azamattary ekenin artynan bildik. Eń bastysy, Túrkııaǵa barǵan jeteýimiz de amanbyz», - deıdi taldyqorǵandyq Almagúl.
Esterińizge sala keteıik, 21 qyrkúıekte Túrkııanyń Kemer qalasy mańynda bolǵan jol apaty saldarynan 7 qazaqstandyq aýrýhanaǵa túsken edi. Der kezinde kórsetilgen medıtsınalyq kómek pen hırýrgııalyq ota jastardyń janyn saqtap qaldy. Túrkııada jol apatyna ushyraǵan jerlesterimizdiń barlyǵy elge aman-esen oraldy. Qazir olar elimizdiń emdeý mekemelerinde tıisti em-domyn alyp jatyr.
