Túrkııaǵa reıstiń keıinge qaldyrylýyna baılanysty barlyq 13 qazaqstandyq Ierýsalımge oraldy - QR SІM
ASTANA. QazAqparat - QR SІM túrik áýekompanııasynyń reısti keıinge qaldyrýyna baılanysty Izraılden Túrkııaǵa jete almaı jatqan bizdiń azamattar jaıly máseleni erekshe baqylaýda ustap otyr, dep habarlady Qazaqstannyń syrtqy saıası vedomstvosynyń baspasóz qyzmeti.
Búgin túnde «TezTour» týrıstik kompanııasy Palestınaǵa jetkizgen 13 qazaqstandyq osy eldegi jaǵdaıǵa baılanysty Túrkııaǵa josparlanǵan reıstiń keıinge qaldyrylýyna oraı, Izraıldegi qonsýldyń jáne QR Elshiligi qyzmetkerleriniń kúshimen Ierýsalım qalasyna oraldy.
Qazaqstandyq týrıster qala qonaqúıleriniń birine ornalastyryldy.
Sondaı-aq qazaqstandyq dıplomattardyń kómegimen Vıfleem qalasynan 2 ýkraındyq jáne 2 reseılik azamat shyǵaryldy.
Qazirgi ýaqytta bizdiń azamattardy Túrkııaǵa jedel jetkizý boıynsha barlyq quziretti organdarmen belsendi kelissózder júrgizilýde.
