Túrkııaǵa bıdaı, jasymyq, maıly tuqymdar eksporttaýǵa múddelimiz – Oljas Bektenov
ASTANA. KAZINFORM – Qazaqstan Túrkııaǵa bıdaı, jasymyq, maıly tuqymdar eksporttaýǵa múddeli. Bul týraly Úkimet úıinde Túrkııa Vıtse-prezıdenti Jevdet Iylmazben Saýda-ekonomıkalyq yntymaqtastyq jónindegi komıssııanyń 14-otyrysyn ótkizip jatqan Premer-mınıstr Oljas Bektenov aıtty.
- Aýyl sharýashylyǵy salasynda oń dınamıka baıqalyp otyr. 2025 jyly agroónerkásiptik keshendegi taýar aınalymy 25 paıyzdan astam ósip, 360 mln dollarǵa jýyqtady. Bul baǵytta agrotehnologııalar men saqtandyrý salasynda tájirıbe almasylyp jatyr, - dedi Oljas Bektenov.
Úkimet basshysy aldaǵy kezeńde taýar aınalymyn ártaraptandyrý, eksport nomenklatýrasyn keńeıtý jáne qosylǵan quny joǵary birlesken óndiristerdi iske qosý mańyzdy ekenin aıtty.
- Bıdaı, jasymyq, jem, maıly tuqymdaryn Túrkııaǵa eksporttaýǵa múddelimiz. Osyǵan baılanysty ýákiletti organdarymyzǵa Túrkııanyń veterınarlyq jáne fıtosanıtarlyq standarttaryna sáıkestik máseleleri boıynsha birlesken jumys júrgizýdi usynamyn, - dedi Premer-mınıstr.
Aıta keteıik, Qazaqstan túrik ınvestorlaryna birlesken jobalardy iske asyrý úshin memlekettik qoldaý quraldaryn usynýǵa daıyn.
