Túrkııaǵa ápkesiniń qujatymen ushpaq bolǵan almatylyq ustaldy
ASTANA. QazAqparat - Almaty áýejaıynda ápkesiniń qujatymen Túrkııaǵa ushpaq bolǵan qala turǵyny anyqtaldy, dep habaraıdy QazAqparat QR UQK Shekara qyzmetine silteme jasap.
Vedomstvonyń málimetinshe, búgin tańerteńgi «Almaty» shekaralyq baqylaý otrıadynyń shekarashylary Almaty halyqaralyq áýejaıynan «Almaty-Antalıa» baǵytymen ushqaly turǵan VSV-471 áýe reısinen qazaqstandyq azamatshany ustaǵan. «Tekserýge usynǵan tólqujatta bul azamatsha 1986 jyly týylǵan «K.M» dep kórsetilgen, alaıda qujatta kórsetilgen jasynan tym jas kórinip, sol arqyly shekarashylardyń kúdigine ilingen azamatsha, shyn máninde 1991 jyly týylǵan «K.L.» bolyp shyqty. Sýret bir qaraǵanda óte uqsas, sebebi, tólqujat bóten bolǵanymen ıesi bóten emes, onyń týǵan ápkesi ekendigi anyqtaldy», delingen habarlamada.
Qazir atalmysh oqıǵaǵa qatysty tekserý sharalary júrgizilýde.
