Túrkııadan jetkizilgen Kúnshyǵarov Atyraýda terakt jasaýǵa qatysy bar dep kúdiktelýde - UQK

ASTANA. QazAqparat - Keshe Túrkııadan ekstradıtsııalanǵan Eldos Kúnshyǵarov 2011 jyly Atyraýdaǵy eki teraktige qatysy bar, dep habarlaıdy QazAqparat QR UQK baspasóz qyzmetine silteme jasap.

«16 qazanda Ulttyq qaýipsizdik komıteti jáne Bas prokýratýra qyzmetkerleri 2011 jyldan bastap, terrorlyq akt daıyndaý jáne terrorlyq áreketke qatystylyǵy boıynsha kúdikti retinde izdestirilgen Qazaqstan azamaty Eldos Kúnshyǵarovty Ystambuldan Atyraýǵa jetkizdi Qazirgi ýaqytta oǵan qatysty tergeý amaldary júrgizilýde», - delingen habarlamada.

E.Kúnshyǵarovtyń ustalýy jáne elge jetkizilýi UQK, Bas prokýratýra jáne Syrtqy ister mınıstrligimen ózara birlesken jumys, sondaı-aq túrkııalyq seriktester jáne Interpol bıýrosymen tyǵyz árekettesýi nátıjesinde múmkin bolǵan.

Komıtettiń baspasóz qyzmetiniń málimetinshe, Eldos Kúnshyǵarov 2008 jyly aýǵan-pákistan aýmaǵyna shyǵyp, sol jerde Atyraý qalasynda 2011 jylǵy qazanda bolǵan eki jarylysqa jaýapty «Djýnd ál-Halıfat» terrorıstik tobyn qurýǵa qatysqan.

Ol 2013 jyly zańsyz Sırııaǵa ótip, «Djabhat an-Nýsra» terrorıstik uıymynyń qataryna kirgen.  2015 jyldan bastap, Túrkııada jasyrynyp júrgen. Sol jerde anyqtalyp, ustaldy.

Aıta keterligi, budan buryn, 2013 jáne 2017 jyldary, «Djýnd ál-Halıfat» uıymynyń belsendi músheleri Orynbasar Munatov pen Damır Znalıev shetelde quryqtalyp, Qazaqstanǵa qaıtarylǵan. Sot olardyń árqaısysyn 20 jyl merzimge bas bostandyqtarynan aıyrdy.

Eske sala ketsek, keshe Eldos Kúnshyǵarov Túrkııadan ekstradıtsııalanǵany habarlandy. 

Eske sala ketsek, 2012 jyly qyrkúıekte Aýǵanstanda modjahedter jaǵynda soǵysyp júrgen jáne Qazaqstanda astyrtyn lańkestik toptardy basqarǵan 9 atyraýlyqtyń esimi jarııa etilgen bolatyn. Solardyń qatarynda Eldos Kúnshyǵarovtyń aty da atalǵan bolatyn.