Túrkııadan kómek: Qostanaıǵa 70 dana ottegi kontsentratory ákelindi
QOSTANAI. QazAqparat – Qostanaı oblysyna Túrkııa elinen 70 dana ottegi kontsentratory ákelindi. Mundaı kómek ERG kompanııalar tobynyń demeýshiligimen jetkizilip otyr, dep habarlaıdy QazAqparat oblys ákimdiginiń densaýlyq saqtaý basqarmasyna silteme jasap.
Qostanaıǵa ákelingen ottegi kontsentratorlarynyń bir bóligi Túrkııada, qalǵandary AQSh-ta jasalǵan. Sapasy joǵary bul jabdyqtar óńirdegi COVID-19 ınfektsııasyna shaldyqqandardy emdep jatqan barlyq mekemelerge taratylyp berilmek.
«Oblystyq bıýdjetten emdeý mekemelerine ottegi júıesin tartý jumystaryna qarajat bólindi. Aldymen, emdeý oryndaryna aýa jınaý tsısternalary ornatylady, sol arqyly ottegi árbir palataǵa, árbir naýqasqa taratylady. Mundaı qondyrǵylar Qostanaı oblystyq aýrýhanasy, Qostanaı qalalyq aýrýhanasy, Tobyl qalasyndaǵy týberkýlezge qarsy dıspanser jáne Rýdnyı qalalyq aýrýhanasyna ornatylady dep kútilýde», — dedi oblystyq densaýlyq saqtaý basqarmasy basshysynyń orynbasary Erbolat Dospanov.
Oblystyq týberkýlezge qarsy dıspanserdiń ókili Janat Moldataevanyń aıtýynsha, qazir medıtsınalyq mekemede 55 naýqas jatyr. Olardyń teń jartysyna tynys alý quraldary qajet. Sol sebepti, búgingi kelgen kómek ondaǵy patsıentterge zor demeý bolmaq.
