Túrkııadan Qytaıǵa Orta dáliz arqyly alǵashqy júk poıyzy attandy
ASTANA. KAZINFORM – Orta dáliz baǵyty boıynsha alǵash ret Túrkııadan Qazaqstan arqyly Qytaıǵa keri konteınerlik tasymal uıymdastyryldy.
Joba «Qazaqstan temir joly» UK» AQ-nyń enshiles uıymy «KTZ Express» AQ-y men túrkııalyq Pasifik Eurasia Lojistik Dış Ticaret A.Ş. kompanııasynyń birlesýimen júzege asyryldy.
Konteınerlik poıyz Transkaspıı halyqaralyq kólik baǵyty arqyly Izmır – Aqtaý porty – Altynkól stantsııasy – Chensıan baǵytymen júrip ótti. Sońǵy núkte Qytaıdyń Fýtszıan provıntsııasynda ornalasqan.
Poıyz quramynda turmystyq tońazytqyshtar tıelgen 50 qyryqfýttyq konteıner bolǵan.
- Qazaqstan aýmaǵyndaǵy Aqtaý porty men Altynkól stantsııasy arasyndaǵy tranzıttik ýaqyt 83 saǵatty qurady.
Jobany iske asyrý Orta dálizdiń shyǵys baǵyttaǵy, ıaǵnı Túrkııa men Eýropadan Qytaıǵa júk tasymaldaýda tıimdi ári básekege qabiletti baǵyt retinde suranysy artyp kele jatqanyn kórsetti, - delingen QTJ taratqan aqparatta.
Mamandardyń málimetinshe, 2025 jyldyń qorytyndysy boıynsha Qazaqstan men Túrkııa arasyndaǵy júk tasymaly kólemi 34 paıyzǵa ósken.
Aıta keteıik, buǵan deıin Ormýz buǵazynyń jabylýy «Orta dálizge» suranysty arttyryp otyrǵany habarlandy.
