Túrkııadan Qazaqstannyń 13 azamaty men olardyń otbasy músheleri ushaqpen elge jiberildi

ASTANA. QazAqparat – Túrkııanyń jer silkinisinen zardap shekken aımaqtarynan Qazaqstannyń 13 azamaty men olardyń otbasy músheleri qazaqstandyq ushaqpen elge jiberildi, dep habarlaıdy QazAqparat.

«17 aqpanda Qazaqstan Elshiliginiń uıymdastyrýymen Túrkııadaǵy jer silkinisi bolǵan aımaqtardan Qazaqstannyń 13 azamaty men olardyń otbasy músheleri jáne Túrkııanyń 2 azamaty Qazaqstannan kelgen ushaqpen Almatyǵa qaıtaryldy», - dep jazdy túrik elindegi dıplomatııalyq ókildigimiz Facebook-te.

17 aqpanda Qazaqstannyń 55 tonna gýmanıtarlyq júgi tıelgen bort Túrkııanyń Gazıantep qalasyna qonǵanyn buǵan deıin jazǵan bolatynbyz.

Óz kezeginde Túrkııanyń Qazaqstandaǵy Elshiligi Facebook-tegi paraqshasynda qazaq eli jınaǵan qaıyrymdylyq qarajatynyń somasy 4 mln dollardan asqanyn jazdy.

Málimetke súıensek, jer silkinisinen zardap shekkenderge kómek retinde 16-17 aqpan kúnderi 411 622 AQSh dollary jınalǵan. Olar Túrkııanyń Tótenshe jaǵdaılar jónindegi basqarmasynyń (AFAD) shotyna aýdaryldy. Osylaısha, Qazaqstan Respýblıkasynan aýdarylǵan qaıyrymdylyq qarajatynyń jalpy somasy 4 028 466 AQSh dollaryn qurap otyr.

Túrkııadaǵy zilzaladan zardap shekkenderge qazaqstandyqtar jınaǵan qarajat kólemi 16 aqpan kúni 3,6 mln dollar bolǵan edi.

Aıta keteıik, Prezıdent Qasym-Jomart Toqaevtyń tapsyrmasymen Túrkııa Respýblıkasyna gýmanıtarlyq kómek retinde 1 mln dollar bólingen edi.

Búginge deıin qazaqstandyq qutqarýshylar Túrkııada úıindiler astynan 7 adamdy qutqaryp, 88 adamnyń máıitin alyp shyqty.

Atalǵan elde 7 baldan asatyn joıqyn jer silkinisi 6 aqpanda boldy. Zilzaladan keıin 4 myńnan astam aftershok tirkeldi.

Sońǵy málimetke sáıkes, tabıǵı apat saldarynan qaza bolǵandar sany 36,1 myńnan asty, 108 myńnan astamy zardap shekti.

Terbelisti túrik elimen shekaralas ornalasqan Sırııa, Lıvan, Irak, Kıpr halqy sezindi.