Túrkııadan Qazaqstanǵa ushatyn reıster sany eki esege jýyq artady
ASTANA. KAZINFORM – 2026 jylǵy 13–14 tamyzda Túrkııanyń Ystanbul qalasynda Qazaqstan Respýblıkasy men Túrkııa Respýblıkasynyń avıatsııa bıligi arasynda kelissózder ótti, dep habarlaıdy QR Kólik mınıstrliginiń baspasóz qyzmeti.
Qazaqstan delegatsııasyn Qazaqstan Respýblıkasy Kólik mınıstrligi Azamattyq avıatsııa komıtetiniń tóraǵasy Saltanat Tompıeva, al túrik delegatsııasyn Túrkııa Respýblıkasynyń Azamattyq avıatsııa bas basqarmasynyń bas dırektory, professor, doktor Kemal ıÝksek basqardy.
Kelissózder qorytyndysy boıynsha 2026 jylǵy 14 tamyzda taraptar azamattyq avıatsııa salasyndaǵy yntymaqtastyqty odan ári nyǵaıtýǵa jáne eki el arasyndaǵy áýe qatynasyn keńeıtýge baǵyttalǵan ózara túsinistik týraly jańa memorandýmǵa qol qoıdy.
Qol jetkizilgen ýaǵdalastyqtarǵa sáıkes, negizgi baǵyttar boıynsha (Ystanbuldan Astana, Almaty jáne Shymkent qalalaryna, AnkaradanAstana jáne Almaty qalalaryna) eki taraptyń áýekompanııalary úshin ruqsat etilgen reıster sany aptasyna 76-dan 138 reıske deıin ulǵaıtyldy.
Týrıstik baǵyttar boıynsha (Antalıa jáne Bodrým qalalarynan Qazaqstan qalalaryna) reıster sany aptasyna 44-ten 86 reıske deıin arttyryldy.
Osylaısha, joǵaryda atalǵan baǵyttar boıynsha ruqsat etilgen reısterdiń jalpy sany aptasyna 120-dan 224 reıske deıin kóbeıdi.
Qalǵan barlyq baǵyttar boıynsha eki taraptyń áýe kompanııalaryna aptasyna 14 reıske deıin oryndaýǵa múmkindik kózdeldi. Bul tikeleı áýe qatynasyn keńeıtýge jáne óńirlik kólik baılanystylyǵyn damytýǵa jaǵdaı jasaıdy.
Sonymen qatar, eki tarap úshinshi elderge tasymaldardy júzege asyrý maqsatynda áýe erkindiginiń besinshi dárejesin paıdalana otyryp, 76-ǵa deıin júk reısin oryndaý týraly ýaǵdalastyqqa qol jetkizdi.
Kelissózder barysynda taraptar azamattyq avıatsııanyń keń aýqymdy baǵyttary boıynsha yntymaqtastyqty jandandyrý jóninde de ýaǵdalasty. Atap aıtqanda, áýe kóligin memlekettik retteý, ushý qaýipsizdigi men avıatsııalyq qaýipsizdikti qamtamasyz etý, avıatsııalyq oqıǵalardy tergep-tekserý, áýejaı ınfraqurylymyn damytý jáne salany tsıfrlandyrý máseleleri qamtyldy.
Qol jetkizilgen ýaǵdalastyqtar Qazaqstan men Túrkııa arasyndaǵy strategııalyq áriptestikti odan ári damytý jolyndaǵy mańyzdy qadam boldy.
-Áýe qatynasynyń keńeıýi áýe tasymaldaryna ósip kele jatqan suranysty qanaǵattandyrýǵa, jolaýshylar men bıznes úshin jańa múmkindikter ashýǵa, týrıstik aǵyndardyń odan ári ósýine, saýda-ekonomıkalyq baılanystardy nyǵaıtýǵa jáne eki dostas memleket arasyndaǵy yntymaqtastyqty damytýǵa yqpal etedi,-delingen habarlamada.
Osyǵan deıin Qazaqstan men Túrkııa arasynda áýe reısteri kóbeıetini týraly jazdyq.
