Túrkııadan Qazaqstanǵa gýmanıtarlyq kómek jetti
«Qazaqstan úkimetiniń arnaıy jibergen ushaǵy Túrkııa Respýblıkasynan gýmanıtarlyq kómek alyp qaıtty. «Aıdyń nury» qory, Ankara shahary mýnıtsıpalıteti, Qoja Ahmet ıAsaýı ýnıversıteti Túrkııa túlekteri birlestigi men osy eldegi qazaq dıasporasynyń jınaǵan kómegi de osy kólikke tıeldi. Júk salmaǵyna kelsek, mysaly bir ǵana túrik úkimetiniń jibergen júginiń quramynda ókpeni jasandy jeldetýge arnalǵan 30 apparat, PTR-taldaýǵa arnalǵan 2 jabdyq, 200 myńnan astam medıtsınalyq preparattar men buıymdar bar», - delingen aqparatta.
Málim etilgendeı, bul kómek úkimetaralyq ózara túsinistik memorandýmy aıasynda tegin tartý etildi.
«Qazaqstannyń COVİD-19 indetimen kúresi nátıje beredi dep senemiz. Mamandarǵa kúsh-qýat bersin, naýqastarǵa shıpa bolsyn. Túrkııa árqashan Qazaqstanmen birge. Sondaı-aq bul kómek osy ýaqytqa deıin shetelge jiberilgen eń aýqymdy kómek ekenin aıta ketkim keledi. Gýmanıtarlyq járdem 6 shildede Erdoǵannyń Elbasy Nursultan Nazarbaevpen telefon arqyly sóıleskennen keıin bergen tapsyrmasyna saı uıymdastyrylyp otyr», - deıdi Túrkııa syrtqy ister mınıstriniń orynbasary ıAvýz Selım Kyran.
Túrkııadaǵy qandastarymyz da atajurttaǵy jaǵdaıǵa alańdap, járdem berýge umtyldy. Ony Eýropadaǵy otandastarymyz da qoldap, bir jaǵadan bas, bir jeńnen qol shyǵardy.
«Shet elde ómir súrsek te, júregimiz árqashan otan dep soǵady. Qysyltaıań kezeńde bir-birimizge demeý bolý – biz úshin borysh. Bir apta ishinde shamamen 1 tonnaǵa jýyq medıtsınalyq kómek jınadyq. Ony «Otandastar» qory, qajetti azamattarǵa tarqatady, - dedi Katead birlestiginiń tóraǵasy Ertolqyn Gaıretýlla.
Sondaı- aq Qoja Ahmet ıAsaýı Ýnıversıteti Túrkııa túlekteri de bilim alǵan elin umytpaı, Qazaqstan elshiligine 28 ottegi kontsentratyn tabystady.
«Kenetten kelgen keseldiń keri áseri tórtkúl dúnıege qatty tıdi. Qazaqstannyń nanyn jedik, sýyn ishtik. Kómek kezek bizde. Bul jıhazdardan bólek, ıAssaýı Ýnıversıtetin támamdaǵan dárigerlerdi jibersek deımiz», - dep atap ótti ıAssaýı ýnıversıteti túlegi Múrat Demırez.
Budan bólek, gýmanıtarlyq kómektiń quramynda «Aıdyń nury» qorynyń 135 dana ottegi kontsentratory da bar. Apparattar osy reıspen jetkizý úshin arnaıy Ystanbuldan Ankaraǵa ákelindi.
Eske salaıyq, Túrkııa men Eýropa qazaqtarynan kelgen gýmanıtarlyq kómek el aýrýhanalaryna taratyla bastaǵanyn jazǵan bolatynbyz.
Sondaı-aq QR Syrtqy ister mınıstrligi Túrkııadaǵy qazaq dıasporasynyń qarajatyna alynǵan gýmanıtarlyq júk Qazaqstanǵa jiberilmeı jatqandyǵy jónindegi aqparat shyndyqqa janaspaıtynyn málim etken bolatyn.
