Túrkııadan Grýzııaǵa júk tasymaldaıtyn alǵashqy poıyz attandy

ERZÝRÝM. Anadoly-QazAqparat – Túrkııanyń Erzýrým qalasyndaǵy Palandoken logıstıkalyq ortalyǵynda 23 shilde kúni Túrkııa men Grýzııa arasyndaǵy alǵashqy júk poıyzyn iske qosý rásimi ótti, dep habarlaıdy QazAqparat Anadoly agenttigine silteme jasap.

Temirjol quramdary jańa baǵytta eksporttyq júkter tasymaldap, Baký-Tbılısı-Kars temir jolymen sapar shegedi.

Sharaǵa «Túrkııanyń memlekettik temir joldarynyń» basshysy Alı Ihsan Ýıgýn, «Grýzın temir joldary» AQ tóraǵasy Davıd Peradze, Pasifik Eurasia logıstıkalyq kompanııasynyń jáne Erzýrým ákimshiliginiń ókilderi qatysty.

Saltanatty rásimde Alı Ihsan Ýıgýn sóz sóılep, Ankara Baký-Tbılısı-Kars jobasynyń júzege asyrylýyna úlken mán beretinin atap ótti.

«2017 jyly qoldanysqa engen atalmysh baǵyt boıynsha Túrkııa, Ázerbaıjan jáne Qazaqstan arasynda júk tasymaly júzege asyryldy. Grýzııanyń Temir joldar basqarmasymen júrgizilgen kelissózder nátıjesinde 17 maýsym kúni yntymaqtastyq týraly kelisim jasaldy. Bizdiń tarapymyzdan iske qosylǵan eksporttyq poıyz bul kelisimniń alǵashqy jemisi bolyp tabylady», - dedi TCDD basshysy.

Davıd Peradze, óz kezeginde, jobany júzege asyrýǵa atsalysqandarǵa alǵys bildirdi.

«Búgin – Grýzııa men Túrkııa úshin tarıhı kún», - dep atap ótti ol.