Túrkııadaǵy zilzala: Úsh kúnge jýyq úıindiniń astynda jatqan 3 jasar qyz qutqaryldy

IZMIR. Anadoly-QazAqparat – Izmır qalasynda qırandylardyń astynda jatqan 3 jasar Elıf Perınchek arada 65 saǵat ótkende qutqaryldy. Ol – Túrkııanyń batysynda bolǵan zilzaladan soń qutqarýshylar aman alyp shyqqan 106-shy turǵyn, dep habarlaıdy QazAqparat Anadoly agenttigine silteme jasap.

Kishkentaı qyz jaqyn mańdaǵy aýrýhanalardyń birine jetkizildi.

Túrkııa úkimeti janyndaǵy tótenshe jaǵdaılardyń aldyn alý jáne saldaryn joıý basqarmasynyń (AFAD) basshysy Mehmet Gıýllıýoglý balanyń qutqarylǵanyna qýanyshyn bildirdi.

Elıftiń týystary buny tańǵajaıyp oqıǵaǵa teńep otyr.

Bunyń aldynda búgin qutqarýshylar úıindiniń astynan 14 jasar Idıl Shırındi alyp shyqqan bolatyn.

2 qarashadaǵy jaǵdaı boıynsha, Túrkııanyń Izmır qalasynda magnıtýdasy 6.6 jer silkinisiniń saldarynan 79 adam qaza tapqan. Zardap shekken 963 adamnyń ishinde 743 adam aýrýhanadan shyǵaryldy, 219 adam em qabyldap jatyr.

Segiz turǵyn úıdiń úıindilerinde izdeý-qutqarý jumysy jalǵasyp jatyr.

Túrkııa jaǵalaýyndaǵy birinshi jer silkinisinen keıin Egeı teńizinde jalpy alǵanda 1120 álsiz sezilgen jerasty dúmpýi tirkelgen, bul rette 43-iniń magnıtýdasy 4 baldan asty.

Túrkııa prezıdenti Rejep Taıyp Erdoǵan zilzala saldaryn joıý úshin memlekettiń búkil qajetti qory shoǵyrlandyrylatynyn málimdedi. Sondaı-aq ol baspanasynan aıyrylǵan barlyq turǵynnyń jańa páter alatynyn atap ótti.