Túrkııadaǵy zilzala qurbandarynyń sany 35,4 myń adamnan asty

ASTANA. QazAqparat – Túrkııanyń ońtústigindegi joıqyn zilzaladan qaza tapqandar sany 35 418 adamǵa jetti. Bul týraly Respýblıkanyń mınıstrler kabınetiniń qorytyndysy boıynsha teleúndeý joldaǵan el prezıdenti Rejep Taıyp Erdoǵan málimdedi, dep habarlaıdy QazAqparat Anadoly agenttigine silteme jasap.

Jınalys Túrkııanyń Tótenshe jaǵdaı saldaryn joıý basqarmasynyń Ankaradaǵy shtab-páterinde ótti.

Memleket basshysynyń sózinshe, jaraqat alǵan 13 208 adam aýrýhanalarda em alyp jatyr.

Sondaı-aq túrik basshysy búkil álemniń sarapshylary Túrkııadaǵy jer silkinisin «aıryqsha tabıǵat qubylysy» dep ataǵanyn aıtyp ótti.

Prezıdent Erdoǵannyń sózinshe, apat aımaǵyndaǵy izdeý-qutqarý jáne basqa da jumystarǵa 250 myńǵa jýyq memlekettik qyzmetker tartylǵan.

Ol zilzala qıratqan aýdandardaǵy izdeý-qutqarý jumystary úıindi astyndaǵy tiri adamdar aman shyǵarylǵanǵa deıin jalǵasatynyn atap ótti.

Memleket basshysynyń aıtýynsha, kelesi aıda Túrkııa bıligi zilzaladan zardap shekkenderge arnalǵan 30 000 úıdiń qurylysyn bastaıdy. Qazirgi ýaqytta 1,6 mln adam baspanaǵa muqtaj.

«Apat aımaǵynda 175 myń palatka, 5,4 myń konteıner úlgisindegi úı ornatylǵan», dep atap ótti Erdoǵan.

Onyń sózinshe, Túrkııa bıligi zilzala bolǵan aımaqtardyń bárinde jyl boıy sapasy joǵary ári adamdarǵa qaýipsiz turǵyn úılerdiń qurylysyn aıaqtaýdy josparlap otyr.

Sondaı-aq túrik basshysynyń sózinshe, apat aımaǵynda 28 myń túrik sarbazy kezekshilikte tur.

«Túrkııa ýaqyty boıynsha 15 aqpan, 20:00-de Túrkııa, Ázerbaıjan jáne Soltústik Kıprdegi Túrik Respýblıkasynda «Túrkııa – bir júrek» uranymen jer silkinisinen zardap shekkenderge kómek kórsetetin naýqan bolady», - dep tolyqtyrdy Rejep Erdoǵan.

Foto: Anadoly Agenttigi