Túrkııadaǵy zilzala kezinde bir qazaqstandyq joǵalyp ketti
Bul aqparatty QR Syrtqy ister mınıstrliginiń resmı ókili Aıbek Smadııarov rastady.
Jer silkinisinen keıin Mıraspen baılanys úzilgen. Qazir ony izdeý jumystary júrgizilýde.
«Dostar, bizdiń dosymyz, Astana Hub tehnoparkiniń halyqaralyq agenti Mırýs Qurmashev Túrkııadaǵy zilzala kezinde joǵalyp ketti. Aǵasy Almat Qurmashevtyń aıtýynsha, jer silkinisi kezinde ol Túrkııanyń Hataı qalasynda bolǵan. Sodan beri onymen baılanys úzildi. Otbasy men dostary alańdap, jan-jaqty izdestirýde, biraq áli de eshqandaı habar-oshar joq. Mırýstyń baýyry men dostary, qazaqstandyq eriktiler búgin túnde izdestirý jumystaryn kúsheıtý úshin Túrkııaǵa ushady», - dep jazylǵan áleýmettik jelide.
Aıta keteıik, ázirge Túrkııadaǵy jer silkinisterinen qaza bolǵandardyń tiziminde Qazaqstan azamattary joq.
Búgin Qazaqstan qutqarýshylaryn aparǵan bortpen Túrkııadan 16 qazaqstandyq jáne 2 Qyrǵyz Respýblıkasynyń azamaty Astanaǵa jetkiziledi.
Sondaı-aq, Mersın qalasyndaǵy Qurmetti konsýl, Túrkııa azamaty Ahmet Býdan qonaqúıge Qazaqstannyń 25 azamatyn, onyń ishinde 19 stýdentti panalatty. Búgin osy 19 qazaqstandyq stýdent qurmetti konsýldyqtyń uıymdastyrýymen Ankaraǵa jetkizildi jáne olar búgin keshke Ankara-Astana reısimen Qazaqstanǵa qaıtady.
