Túrkııadaǵy zilzala aımaǵynda 1 797 turǵyn úıdiń qurylysy bastaldy

ASTANA. QazAqparat – Jer silkinisi aımaǵynda 1 797 turǵyn úıdiń qurylysy bastaldy. Bul týraly Túrkııa Respýblıkasynyń Qazaqstandaǵy Tótenshe jáne ókiletti elshisi Ýfýk Ekıdjı aıtty, dep habarlaıdy QazAqparat tilshisi.

«Úkimetimiz 1 jyl ishinde turaqty baspanalar salý boıynsha sharalar qabyldaıdy. Qazirgi tańda jer silkinisi aımaǵynda 1 797 turǵyn úıdiń qurylysy bastaldy. Naýryz aıynda 270 myń turǵyn úı qurylysyn bastaý josparlanyp otyr», - dedi Ýfýk Ekıdjı.

Elshi dereginshe, birneshe baspanasy bar turǵyndar zardap shekkenderdi bos turǵan úılerine ýaqytsha ornalastyrǵan.

«Osy sharalardan basqa, halqymyz jumylyp, túrli naýqan uıymdastyra bastady. «Úıiń meniń úıim bolsyn» bastamasymen birneshe úıi bar azamattarymyz jer silkinisinen zardap shekken kisilerge baspanalaryn ýaqytsha berip jatyr», - dep málim etti Elshi.

Elshi brıfıng barysynda zardap shekkenderge kómek retinde qazaqstandyqtar 5 mln dollar jınaǵanyn aıtyp, alǵys bildirdi.

Sonymen qosa, búginge deıin jer silkinisinen qıraǵan jáne qulaý aldynda turǵan 156 myń ǵımarat anyqtalǵanyn málim etti.

Eske salaıyq, 6 aqpanda Kahramanmarashta magnıtýdasy 7 baldan asatyn eki jer silkinisi boldy. Jerasty dúmpýleri eldiń 10 provıntsııasynda, sondaı-aq kórshiles memleketterde, sonyń ishinde Sırııada da sezildi.