Túrkııadaǵy Tótenshe jaǵdaı rejimi qazaqstandyq týrısterdi jergilikti demalys oryndaryna baǵyttaýy múmkin
ALMATY. QazAqparat - Túrkııada engizilgen Tótenshe jaǵdaı rejimi saldarynan qazaqstandyq týrıster jergilikti demalys oryndaryn tańdaýy múmkin. Bul týraly búgin belgili qazaqstandyq ekonomıst Oljas Qudaıbergenov málimdedi.
«Meniń oıymsha, bul jaǵdaıdyń ekonomıkaǵa, ıaǵnı taýarlar aınalymyna anaý aıtqandaı áseri bolmaıdy. Tótenshe jaǵdaı rejimi bul úderisterge kedergi etpeýi tıis. Biraq, týrızmge áser etýi ábden múmkin. Óıtkeni, Túrkııaǵa baratyn týrıster legi azaıady», - dedi Oljas Qudaıbergenov.
Ol sonymen qatar, bul jaǵdaı Qazaqstannyń týrızm salasy úshin tıimdi ekendigin aıtty.
«Eger Túrkııaǵa baratyn týrıster legi ishki belgili demalys oryndaryna baǵyttalatyn bolsa, onda Qazaqstan úshin bul óte tıimdi», - dedi sarapshy.
Óz kezeginde ekonomıst Jaras Ahmetov QR Statıstıka jónindegi komıtetiniń derekterine súıene otyryp, Túrkııanyń Qazaqstan Respýblıkasynyń syrtqy saýda aınalymyndaǵy úlesi bıylǵy jyldyń alǵashqy bes aıynda - 2,3 paıyzdy, al ótken jyly osy merzim aralyǵynda - 3,4 paıyzdy quraǵanyn jetkizdi.
«Eki el arasynda saýda qarym-qatynasynyń álsireıtindigine esh negiz joq. Eger adamdardyń ómirine ashyq túrde qaýip tónbeıtin bolsa, onda týrıster legi azaımaıdy. Degenmen, dál qazir azaıǵan da bolar», - dedi ol.
Onyń pikirinshe, Túrkııa memleket basshysy Erdoǵannyń qolǵa alǵan is-sharalary Túrkııanyń ınvestıtsııalyq tartymdylyǵyna keri áser etýi múmkin. Al bul ýaqyt óte kele el ekonomıkasyna da keri áserin tıgizbeı qoımaıdy.
