Túrkııadaǵy tolqýlar tynyshtalmaı tur
ASTANA. 4 maýsym. QazAqparat - Túrkııanyń Ankara qalasyndaǵy tolqýlar kúsheıip keledi.
Endi, memlekettik qyzmetkerlerdiń kásipodaǵy da ereýilge shyǵatyndyǵyn málim etti.
Búginde Túrkııadaǵy tolqýlarda qaza tapqandar týraly aqparat tarala bastady. Ázirge, 20 jastaǵy túrik azamatynyń ólimi resmı túrde rastalyp otyr. Ol búlikshilerge qarsy úlken jyldamdyqpen júrip soǵylǵan taksıstiń kesirinen qaıtys boldy. Odan bólek, taǵy tórt adam jaraqat aldy. Jalpy, Túrkııanyń Ankara, Izmır, Ystambul qalalarynda bolyp jatqan narazylyq aktsııalary barysynda ondaǵan adam jaraqat alyp, tutqynǵa túskenderdiń sany 2 myńǵa jetti.
Endi, Túrkııadaǵy memlekettik qyzmetkerlerdiń kásipodaǵy da ereýilge shyǵatyndyǵyn málimdedi. Búgin-erteń, 4-5 maýsym kúnderi olar «eskertý ereýiline» shyqpaq. Kásipodaq basshylary búgingi bıliktiń áreketin «memlekettik lańkestikke» balap, «Ádilettilik pen damý» partııasyn «demokratııanyń jaýy» dep atady. Túrkııanyń premer-mınıstri Redjep Erdoǵan bolsa, onyń barlyǵyn ekstremıstik toptardyń aram pıǵylymen baılanystyryp otyr.
