Túrkııadaǵy sý tasqynynan mert bolǵandar sany ósti

ANKARA. ANADOLY- QazAqparat – Túrkııanyń Qara teńiz jaǵalaýynda ornalasqan Kastamon jáne Sınop provıntsııalarynda bolǵan sý tasqynynan kóz jumǵan adamdar sany 38-ge jetti. Bul týraly Túrkııanyń densaýlyq saqtaý mınıstri Fahrettın Kodja aıtty, dep habarlaıdy QazAqparat Anadoly agenttigine silteme jasap.

«Kastamonda sý tasqynynan 32 adam kóz jumdy. Taǵy 228 zardap shegip, onyń 12-si aýyrýhanaǵa jatqyzyldy», - dedi Kodja.

Mınıstrdiń sózine qaraǵanda, Sınop provıntsııasynda da tabıǵı apat alty adamnyń ómirin qıǵan jáne 56 turǵyn zardap shekti.

Eske salsaq, buǵan deıin Túrkııanyń soltústigindegi Kastamoný provıntsııasynda sý tasqyny saldarynan 25 adam qaza tapqany týraly habarlaǵan bolatynbyz.

Sý tasqyny 11 tamyzda Sınop, Bartyn, Karabıýk jáne Kastamoný provıntsııalarynda boldy. Túrkııanyń soltústik provıntsııasy Bartynda kópir qıraǵan.