Túrkııadaǵy saılaý nátıjesi Qazaqstanǵa qalaı áser etýi múmkin – saıasattanýshy pikiri
Sarapshynyń aıtýynsha, qoǵamdyq pikirge arnalǵan barlyq saýalnamalar jaǵdaıdyń 50/50 bolyp turǵanyn kórsetedi.
«Túrkııada jańa prezıdent saılanǵan jaǵdaıda onyń bizdiń logıstıkalyq jáne áskerı-saıası jobalarymyzǵa áser etetini túsinikti. Barlyǵy búgin daýys berý qorytyndysy boıynsha sheshiletin bolady, alaıda saılaý ekinshi kezeńge qaldyrylýy da múmkin», - dep esepteıdi Danııar Áshimbaev.
D. Áshimbaev Túrkııadaǵy saılaýdyń nátıjesi Taıaý Shyǵysqa da, Eýropa elderine de, postkeńestik elderge de áser etetinin atap ótti. Sebebi Túrkııa – álemdik saıası arenadaǵy mańyzdy oıynshy.
«Erdoǵannyń bılikte qalýy nemese qalmaýy túrik halqynyń sheshimine baılanysty, bul aımaqtaǵy geosaıası jaǵdaıǵa áser etedi. Negizgi básekeles Erdoǵannyń artynda ishki jáne syrtqy oıynshylar turǵany túsinikti. Árıne, Túrkııa basshylyǵyna anaǵurlym zaıyrly jáne ambıtsııasy azyraq adamnyń kelýi Túrkııadaǵy qarym-qatynasty qalypqa keltirýge yqpal etedi, ekinshi jaǵynan, balamaly úmitkerdiń Batysqa baǵdar alǵany túsinikti. Bul jaǵdaı biz úshin ári syn-qater, ári múmkindikter. Onyń ústine Túrkııamen yntymaqtastyq deńgeıiniń tómendeýi ekitalaı. Sonymen qatar, túrik porttaryna baǵdarlanǵan Transkaspıı baǵytyn damytý da barlyq jaǵdaıda ózekti bolatynyn túsiný qajet», - dedi Danııar Áshimbaev.
Aıta keteıik, Túrkııada 28-shi shaqyrylymdaǵy parlament jáne prezıdent saılaýy ótip jatyr. Saılaý ýchaskeleri tańǵy 8:00-de ashylyp, jergilikti ýaqyt boıynsha 17:00-de jabylady. Elde barlyǵy 191 885 daýys berý jáshigi ornatyldy.
