Túrkııadaǵy poıyz apaty: mert bolǵandar arasynda qazaqstandyqtar joq
ASTANA. QazAqparat - Túrkııanyń Tekırdag provıntsııasynda jolaýshylar poıyzy aýdarylyp, 24 adam mert boldy. Olardyń arasynda qazaqstandyqtar joq, dep habarlaıdy QazAqparat tilshisi QR Syrtqy ister mınıstrligine silteme jasap.
«Aldyn ala aqparattar boıynsha, Túrkııadaǵy poıyz apatynda zardap shekkender men qaza tapqandar arasynda Qazaqstan azamattary joq. Qazaqstan konsýldary Túrkııanyń tıisti organdarymen tyǵyz baılanysta jumys istep jatyr», - dep habarlady QR Syrtqy ister mıınstrliginiń resmı ókili Aıbek Smadııarov.
Anadoly agenttigi habarlaǵandaı, poıyz Túrkııa men Bolgarııa shekarasyndaǵy Kapıkýle qalasynan Ystanbulǵa kele jatqan. Aldyn ala boljam boıynsha, poıyzdyń aýdarylýyna qolaısyz aýa raıy yqpal etken. Úzdiksiz jaýǵan jaýynnan rels astyndaǵy topyraq shaıylyp ketken.
Apat kezinde poıyzda 362 jolaýshy jáne 6 temirjol qyzmetkeri bolǵan. Túrkııanyń vıtse-premeri Redjep Akdag poıyz apatynan qaza tapqandar sany 24-ke jetkenin habarlady.
Sondaı-aq, Túrkııanyń densaýlyq saqtaý mınıstri Ahmet Demırdjan 318 jolaýshynyń aýrýhanaǵa jetkizilgenin, taǵy 124 jolaýshynyń stantsıonarlyq em qabyldap jatqanyn jetkizdi.
