Túrkııadaǵy otandyq týrısterdiń qalǵan bóligi úshin QR TJM-niń ushaqtary attandyrylmaıtyn boldy
ALMATY. 11 maýsym. QazAqparat - Dúısenbi, 10 maýsym kúni Túrkııada qalyp qoıǵan qazaqstandyq týrısterdiń kezekti legin elge jetkizý úshin QR TJM-niń ushaǵy jolǵa ázirlendi.
Biraq is-sharalar toqtatyldy: Elimizdiń elshisi QR Úkimeti atynan túrik tarapymen júrgizgen uzaq kelissózderden keıin, bankrotqa ushyraǵan «Sky Airlines» kompanııasynyń oryndalmaǵan barlyq reısterin túriktiń «Pegasus» áýe tasymaldaýshysy oryndaıtyny týraly kelisimge qol jetkizdi. Bul týraly QazAqparat tilshisine Qazaqstan týrıstik qaýymdastyǵynyń (QTQ) prezıdenti Roza Asanbaeva málim etti.
Onyń aıtýynsha, keshe túnde 165 jolaýshy, sonyń ishinde 5 bala elge taban tiredi.
«Búgingi tańda saıahatshylar úılerine jetti. Sonymen qatar búgin, túngi saǵat 00.20-da Almatyǵa «Pegasus» áýe kompanııasynyń ushaǵy 211 adamdy jetkizedi. Astanaǵa 11.30-da bankrotqa ushyraǵan «Sky Airlines»-tyń mindettemeleri boıynsha reısti oryndaıtyn ushaq kelip qondy»,- dedi R.Asanbaeva.
Qaýymdastyq prezıdenti atap ótkendeı, «Sky Airlines» kompanııasynyń oryndalmaǵan mindettemelerinen japa shekken jolaýshylarǵa qazaqstandyq TJM qolǵabys etti.«Ótken demalys kúnderi TJM 200-ge jýyq týrısti elge jetkizdi», - dep atap ótti ol.
