Túrkııadaǵy kezekten tys saılaý: Nátıje erteń belgili bolmaq
ASTANA. QazAqparat - Túrkııada kezekten tys parlament saılaýy ótti. Osy jolǵy saıası dodada 16 partııa men 21 táýelsiz kandıdat baq synady, dep habarlaıdy 24.kz.
Degenmen sarapshylar negizgi talas-tartys 7 maýsymdaǵy saılaýda 10%-dyq mejeni baǵyndyrǵan eldegi eń iri 4 saıası partııa arasynda órbıtinin alǵa tartady. Ortalyq saılaý komıssııasy taratqan málimet boıynsha, parlamenttik saılaýda 54 mln 49 myń 940 adam daýys berý quqyǵyna ıe. Bul - osymen Túrkııada bir jyldyń ishinde ekinshi márte ótip jatqan parlamenttik saılaý. Alǵashqysy 7 maýsymda bolǵan. Alaıda daýys berý nátıjeleri boıynsha ol saılaýda eshbir partııa basymdyqqa ıe bola almady. Mundaı sátte Túrkııa ata zańy boıynsha 45 kúnniń arasynda saılaýshylardyń 10% daýysyn jıǵan partııalar koalıtsııalyq úkimet qurýy tıis edi. Biraq saıası partııalardyń jetekshileri ózara kelisimge kele almady. Osy sebepten túrik halqy araǵa 5 aıdaı ýaqyt salyp, óz úmitkerlerine qaıta daýys berýde.
- Otbasymyzben birge saılaý ýchaskemizge baryp, daýsymyzdy berdik. Saılaýshylardyń belsendiligi óte joǵary. Óıtkeni elimizdiń keleshegi búgingi tańdaýymyzǵa tikeleı baılanysty bolmaq. Endi osydan soń jańa úkimet jasaqtalyp, ult múddesine qyzmet etedi dep oılaımyn,- deıdi Ystambul turǵyny Súleıman Ýzýn.
Taǵy bir Ystambul turǵyny Ismaıyl Gıýpnardyń pikirinshe, saılaýdan saılaýǵa deıin ómir súrýge bolmaıdy. «Bilesizder, sońǵy ýaqytta Túrkııamyzda terrorlyq oqıǵalar jıilep ketti. Onyń sebebi - eldegi saıası partııalardyń arasynda aýyzbirshilik joq. Al ishki alaýyzdyqtar turaqtylyǵymyzǵa nuqsan keltirýde. Sondyqtan bul parlament saılaýynan úmitim zor. Lańkesterdiń kózin qurtyp, memleketimizge beıbitshilik ornatatyn bir ǵana partııa bılik basyna kelsin deımin»,-deıdi ol.
Túrkııa uly ulttyq májilisi 550 depýtattan turady. Atqarýshy úkimet jasaqtaý quzyreti parlamentte kemi 276 depýtaty bar saıası partııaǵa beriledi. Qazir búkil halyqty tolǵandyryp otyrǵan bir ǵana másele osy - mejeni kim baǵyndyrýy múmkin? Saılaýǵa bir apta qalǵanda eń iri 8 áleýmettik zertteý ortalyǵy saýalnama nátıjelerin jarııalady. Eger ol málimetke zer salsaq, Ádilet jáne damý partııasy saılaýshylardyń - 42,1%-yn, al onyń saıası básekelesi Halyqtyq-respýblıkalyq partııasy 26,8% ǵana daýsyn ıelenbek. Ulttyq qozǵalys partııasynyń lektoraty kóbine turaqty - 15-16%-dyń aralyǵynda qubylyp turady. Eldiń shyǵys aımaǵyndaǵy kúrdter ótken saılaýdaǵydaı óz daýystaryn Halyqtyq-demokratııalyq partııasyna beretin bolsa, onda jańa partııa parlament tabaldyryǵyn attamaq.
Túrkııa Respýblıkasynyń prezıdenti Rejep Taıyp Erdoǵan: - Búgin shamamen 54 mln otandasymyz saılaýda daýys beredi. Halqymyz elimizdiń, jerimizdiń turaqtylyǵy jolynda durys tańdaý jasaıdy degen úmitim bar. Osy rette Ortalyq saılaý komıssııasynda, saılaý ýchaskelerinde qyzmet etip otyrǵan barlyq azamattarǵa sáttilik tileımin»,-deıdi.
Túrkııanyń 11-shi prezıdenti Abdýlla Gúl bolsa, osy saılaýdan keıin elde tynyshtyq pen turaqtylyq ornaıtynyna senimdi ekendigin bildirdi.
Túrkııada parlament saılaýy qarsańynda qaýipsizdik sharalary kúsheıtildi. Resmı aqparatqa súıensek, búgin qaýipsizdikti 385 myń polıtsııa men jandarm qadaǵalaýda. Sondaı-aq osy maqsatta eldiń shyǵys aımaǵynda tikushaqtar men áskerı tehnıkalar da jumyldyryldy. Qazir osy ýaqytqa deıin jetekshi saıası partııalardyń kóshbasshylary óz tańdaýlaryn jasady. Túrkııa prezıdenti Rejep Taıyp Erdoǵan Ystambulda, al premer-mınıstr Ahmet Dáýitoǵly týǵan jeri Konııa qalasyndaǵy saılaý ýchaskesinde daýys berdi. Saılaý Astana ýaqytymen saǵat 20:00-de aıaqtaldy. Al onyń alǵashqy nátıjeleri erteń belgili bolmaq.
