Túrkııadaǵy qazaqstandyqtar prezıdent saılaýyna belsendi qatysyp jatyr

ANKARA. QazAqparat - Túrkııa Respýblıkasynda uıymdastyrylǵan úsh saılaý ýchaskesinde qazaqstandyqtar daýys berip jatyr, dep habarlaıdy QazAqparat tilshisi.

Qazaqstannyń Túrkııadaǵy dıplomatııalyq ókildikteri janynda jumys isteıtin №286, 255 jáne 296 saılaý ýchaskelerinde daýys berý jergilikti ýaqyt boıynsha tańǵy saǵat 7:00-de bastalyp, 20:00-ge deıin jalǵasady.

Elde demalys kúnine qaramastan tańerteńnen bastap saılaýshylardyń belsendiligi baıqalady.

Otanynan jyraqta júrip azamattyq ustanymyn tanytqan qazaqstandyqtardyń basym bóligi – stýdentter men osynda turatyndar.

Qazaqstannyń Túrkııadaǵy elshiliginiń málimetinshe, Ankaradaǵy №286 saılaý ýchaskesinde 1000-nan astam saılaýshy daýys beredi dep kútilip otyr.

Al Ystanbul men Antalııada 600-ge jýyq saılaýshy bar.

Munda azamattyq boryshyn óteý úshin qala turǵyndary ǵana emes, konsýldyq okrýgtiń 20 provıntsııasynda turyp, bilim alyp jatqan jastarymyz da kelip jatyr.

Keıbir stýdentterdiń ótinishi boıynsha elshilik qyzmetkerleri arnaıy kólik uıymdastyryp, jastarymyzdy Túrkııa astanasyna jetkizdi.

Sonymen birge olar úshin bólek baǵdarlama uıymdastyrylyp, qazir fýtboldan týrnır ótýde.

Qazaqstannyń Túrkııadaǵy Elshiligi janyndaǵy ýchaskelik komıssııanyń tóraǵasy Nurıddın Amanquldyń aıtýynsha, saılaýda joǵary belsendilik baıqalady, halyq tańnan bastap óz tańdaýyn jasaýǵa kelip júr.

«Tańerteń 7:00-den bastap jumysqa kiristik, saılaýshylardyń legi birden kóbeıdi. Qazirgi ýaqytta stýdentterdiń belsendiligi óte joǵary. Týǵan jerinen jyraqta júrgen Qazaqstan jastarynyń saılaý ýchaskelerine bar yntasymen kelip, óz tańdaýyn jasap jatqanyna qýanyshtymyn. Barlyǵy qalypty jumys istep tur. Eshqandaı tótenshe oqıǵa joq. Barsha jurt merekelik kóńil-kúıde», - dedi N.Amanqul.

Sonymen qatar, saılaý komıssııalarynyń músheleri Túrkııada ashylǵan úsh saılaý ýchaskesinde daýys berý úshin barlyq qajetti jaǵdaı jasalǵanyn jáne buǵan QR Syrtqy ister mınıstrliginiń tájirıbeli qyzmetkerleri tartylǵanyn atap ótti.

Túrkııadaǵy túrli halyqaralyq uıymdar ókilderiniń arasynan táýelsiz baqylaýshylardyń aıtýynsha, saılaý zańnamasy men daýys berý tártibin buzý faktileri bolǵan joq.

Jumys belgilengen norma aıasynda júrip jatyr.