Túrkııadaǵy qazaqstandyq týrısterdi elge jetkizýge ketetin shyǵyndardy QR Úkimeti óz moınyna aldy
ASTANA. 9 maýsym. QazAqparat - Túrkııadan qazaqstandyq týrısterdi elge jetkizýge ketetin shyǵyndardy QR Úkimeti ózi óteıdi.
Bul týraly QR Syrtqy ister mınıstrliginiń baspasóz qyzmetinen málim etti.
Buǵan deıin habarlanǵandaı, 6 maýsym kúni «Sky Airlines» Túrkııa áýekompanııasynyń bankrotqa ushyraýyna baılanysty bir myńnan astam otandasymyz Túrkııadan Qazaqstanǵa qaıta almaı qaldy.
Qazaqstan Respýblıkasynyń Antalııadaǵy konsýldyǵynyń málimetterine sáıkes, 8 maýsymdaǵy jaǵdaı boıynsha, túrik elinde dál osy áýekompanııasynan bıletterdi satyp alǵan 1077 qazaqstandyq boldy.
Qalyptasqan jaǵdaıǵa baılanysty azamattarymyzǵa kómek kórsetý úshin QR Úkimetinde arnaıy keńes ótip, onyń nátıjesi boıynsha Tótenshe jaǵdaılar mınıstrligine qazaqstandyqtardy Antalııadan ákelýge eki ushaqty jiberý júkteldi.
8 maýsymda Almaty men Astanaǵa 220-dan astam adamnyń ushyp shyǵýy josparlandy, olardyń denin áıelder, balalar, qarttar men múmkindikteri shekteýli jandar qurady. 9 maýsym kúni Almaty men Astanaǵa 260-tan astam adamdy alyp kelý josparlanýda. Sondaı-aq 10 maýsymda 182 adam - Aqtóbege, 11 maýsymda 210 adam - Astanaǵa, 202 adam Almatyǵa jetkiziletin bolady. Atap ótý kerek, atalmysh ushýlarmen bolatyn shyǵyndardy QR Úkimeti óz moınyna aldy.
Atalǵan máseleni sheshý úshin QR-dyń Túrkııadaǵy barlyq dıplomatııalyq ókildikteriniń kadrlary jumyldyryldy. Antalııaǵa Ankara men Ystambuldan QR-dyń konsýldary attandy.
Jergilikti týroperatorlarmen, atap aıtqanda, «Kýalıtým Týr» kompanııasymen bolǵan kelissózderdiń nátıjesinde, qazaqstandyqtar ushyp shyqqanǵa deıin olardy qonaqúılerde tegin ornalastyrýǵa qol jetkizildi.
