Túrkııadaǵy qazaqstandyq sarapshy: Halyq saılaýǵa óte belsendi qatysyp jatyr
«Túrkııada qazir ótip jatqan saılaý óte mańyzdy bolyp otyr. Onda 60 mıllıonnan astam el turǵyny daýys bere alady, onyń ishinde 5 mln adam – jasy 18-ge jańa tolǵan jas saılaýshylar. Prezıdenttikke bastapqyda 4 kandıdat túsken edi, onyń biri Muharrem Inje óz kandıdatýrasyn alyp tastady. Osylaısha úsh kandıdat qaldy jáne prezıdent bolǵan Rejep Taıyp Erdoǵannyń basty qarsylasy – Kemal Qylyshdaroǵly boldy. Qazir boljam jasaý óte qıyn, eki tarap ta sózsiz jeńiske jetetinderin aıtýda. Saılaýdan bas tartqan Muharrem Injeniń jaqtaýshylary kimge daýys beredi, bul jalpy saılaý nátıjesine qalaı áser etedi, sol qyzyq», - dedi Aınur Noǵaeva QazAqparat tilshisine bergen suhbatta.
Sarapshynyń aıtýynsha, Túrkııadaǵy prezıdent saılaýy memlekettiń ózi úshin, aımaq úshin jáne álem úshin óte mańyzdy, kóptegen elder saılaý nátıjesin kútýde.
«Halyqaralyq qatynastar mamany bolǵandyqtan, meniń baıqaǵanym Túrkııanyń halyqaralyq oıynshy retinde kópvektorly saıasat elge kóptegen jetistikter ákeldi. Dál osy kópvektorlyq saıasat saqtala ma, joq pa, búgingi saılaý aıqyndap beredi. Sonymen birge, Túrkııada prezıdenttik saılaýmen qatar parlament saılaýy da ótip jatyr, onda 26 partııa baq synaýda. Onyń 13-i birikken alıanstar bolsa, 13-i – jeke partııalar», - dedi A. Noǵaeva.
Spıker «Aqpan aıynda Túrkııada bolǵan joıqyn zilzala qazirgi saılaýǵa qalaı áser etti?» degen suraqqa jaýap berdi.
«Halyqtyń pikiri ekige jaryldy deýge bolady. Bir bóligi bılik jyldar boıy qurylys salasyn bosańsytyp jiberdi deıdi, ekinshi bir bóligi – kináli merdigerlerdiń ustalýyn, kúni-túni jańa úılerdiń salynýyn, barlyq mınıstrdiń apat oryndaryna arnaıy kelgenin memlekettiń úlken qoldaýy dep baǵalady. Koronavırýs indeti órshigende Túrkııa bıligi 150 memleketke járdem kórsetip, tegin dári-dármekter jibergen eken. Zilzala bolǵanda Túrkııaǵa da kóptegen elder kómek jiberdi. Muny R.Erdoǵannyń halyqaralyq arenadaǵy bedelimen baılanystyratyndar bar. Jalpy zilzala 13 provıntsııada boldy, onda 20 mln halyq turady, bul da saılaý nátıjesine eleýli yqpal etedi», - dedi A. Noǵaeva.
Qazaqstandyq sarapshy Túrkııa halqynyń saılaýǵa óte belsendi qatysatynyn aıtty.
«Halyq tutas kóshege shyǵady, bir partııa saılaýshylarmen kezdesip, mıtıng ótkizip jatsa, qarama-qarsy betinde ekinshi bir kandıdatty qoldaý naýqany júrip jatady. Ár partııa óz shatyryn quryp otyrady, oǵan turǵyndar baryp, óz oılaryn, pikirlerin aıtyp, jaqsy qoldaý kórsetedi. Jastar da «Twitter» jelisinde óz oıyn ashyq jazady. ıAǵnı halyq alańda da, áleýmettik jelide de óte belsendi deýge bolady», - dedi qazaqstandyq maman.
Aıta keteıik, Túrkııada 28-shi shaqyrylymdaǵy parlament jáne prezıdent saılaýy ótip jatyr. Saılaý ýchaskeleri tańǵy 8:00-de ashylyp, jergilikti ýaqyt boıynsha 17:00-de jabylady. Elde barlyǵy 191 885 daýys berý jáshigi ornatyldy.
