Túrkııadaǵy halyqaralyq týrnırde Eskendir Ábilhaıyr altynǵa ıe boldy
ASTANA. QazAqparat - Qazaqstandyq jas taekvondoshy Eskendir Ábilhaıyr Belek qalasynda ótip jatqan Turkish Open týrnıriniń altynyna ıe boldy, dep habarlady taekvando qazaqstandyq federatsııasy.
15 aqpanda týrnır aıasynda jastar arasynda jarys ótti. Onda 68 kg salmaq dárejesinde óner kórsetken Ábilhaıyr Bolgarııa, Túrkııa jáne Norvegııa ókilderinen basym tústi. Nátıjesinde sportshy jeńiske jetti.
Elimizdiń taǵy bir ókili Rabıl Saǵıtjanov ta jaqsy nátıje kórsetti. Tórt túrik ókilin jeńgen qazaqstandyq fınalda ırandyq Amır Valıpoýrýdan ǵana jeńildi. Nátıjesinde ekinshi orynǵa turaqtady.
Jarystyń sońǵy kúninde chempıonattyń úzdik sportshylary anyqtalady.
Eske sala keteıik, jarystyń alǵashqy kúninde qazaqstandyq taekvondoshylar eresekter arasynda úsh medalǵa ıe boldy.
