Túrkııadaǵy eń kóne Gebeklı-Tepe ǵıbadathanasynyń taǵy bir qupııasy ashyldy

ASTANA. QazAqparat - Arheologtar Túrkııanyń ońtústik-shyǵysynda ornalasqan Jerdiń eń kóne ǵıbadathanasy - Gebeklı-Tepede qazba jumystaryn jalǵastyryp jatyr, dep habarlaıdy Anadoly agenttigi.

Shanlyýrfa provıntsııasyndaǵy qazba jumystary kezinde ǵıbadat etýge arnalǵan 15 iri oryn, neolıt dáýiriniń ókilderi rıtýaldyq maqsatta paıdalanǵan 200-den astam tasty kolonna tabyldy.

«Harran» túrik ýnıversıtetindegi Arheologııa fakýltetiniń basshysy, professor Mehmet Onal «Anadolyǵa» Gebeklı-Tepe aýmaǵyndaǵy arheologııalyq qazbalar shamamen 150 jylǵa jalǵasatynyn aıtty.

«Túrkııa ıÝNESKO-nyń álemdik jádigerleriniń qataryna engen Gebeklı-Tepe keshenin saqtap, keler urpaqqa jetkizý úshin barlyq jaǵdaıdy jasaıdy»,- dedi professor.

Onyń aıtýynsha, Gebeklı-Tepe mańaıyndaǵy qazba jumystary shırek ǵasyrdan beri jalǵasyp kele jatyr. Zertteýler júrgizilip jatqan jerdiń aýmaǵyn eskere otyryp, ǵalymdar áli 150 jyldaı eńbektenetinin senimmen aıtýǵa bolady.

«Ǵylymı keńes bul aýdanda beımálim órkenıettiń jańa eskertkishteri tabylatynyna senimdi», - dedi Onal.

Gebeklı-Tepe keshenin alǵash ret 1963 jyly Ystanbul jáne Chıkago ýnıversıtetteriniń mamandary zerttegen.

1995 jyly Nemis arheologııalyq ınstıtýty men Shanlyýrfa mýzeıiniń birlesip júrgizgen qazba jumystary kezinde bıiktigi 3-6 metr bolatyn T-tárizdes stellalar tabylǵan. Olarda neolıt dáýirine jatatyn jyrtqysh ańdar beınelengen bolǵan.

Sondaı-aq, qazba kezinde boıy 65 sm adamnyń músini tabylǵan. Jasy shamamen 12 myń jyldyń aınalasynda dep boljandy.