Túrkııadaǵy Elshilerdiń jubaılary qazaqtyń ulttyq taǵamdarynan dám tatty
Qazaqstandyq dıplomatııalyq ókildikten málim etkendeı, Ankaradaǵy Elshiler jáne Halyqaralyq uıymdar basshylary áıelderiniń tańǵy kokteıli aı saıyn ótedi. Ol SHOM Ankara dep atalady. Bul joly jıyn Qazaqstan Elshiliginiń rezıdentsııasynda uıymdastyryldy.
Túrkııadaǵy Qazaqstan Elshisi Abzal Saparbekulynyń jubaıy Gúlbaný Syrǵabaeva qonaqjaılyq kórsetken jıynǵa 40-qa jýyq meıman qatysty.
Jıynda SHOM Ankara tóraıymynyń orynbasary jáne Belarýstiń Túrkııadaǵy Elshisiniń jary Vera Savınyh búgingi kún tártibindegi máselelerge toqtaldy. Atap aıtqanda, leıkemııa dertine shaldyqqan balalarǵa kómektesý úshin LÖSEV qoryna jınalǵan qarajat jáne basqa da qaıyrymdylyq jumystary talqylandy. Sondaı-aq SHOM Ankara jańa múshelerin tanystyrǵan V. Savınyh uıymnyń aldaǵy josparlarymen bólisti.
Shara aıasynda taspaly keste isimen aınalysatyn G. Syrǵabaeva qatysýshylarǵa óz jumystaryn kórsetip, atalmysh ónerdiń qyr-syrymen bólisti.
Sondaı-aq qonaqtar nazaryna Qazaqstannyń mádenıeti men ekonomıkasyn, týrıstik áleýetin sýretteıtin beınebaıan usynyldy. Al «Otaý» folklorlyq ansambliniń ónerpazdary qazaqtyń dástúrli ásem bıi men áýenderin pash etti.
Meımandarǵa arnalyp qazaqtyń ulttyq taǵamdarynan dastarhan jaıyldy. 
