Túrkııadaǵy Aqmeshit eldi mekeniniń qyzdary shylym shegetin jigitke turmysqa shyqpaıdy
ASTANA. 11 qyrkúıek. QazAqparat - Túrikterdiń Aqmeshit eldi mekeniniń turǵyndarynyń osynaý jat ádetpen kúresip kele jatqanyna talaı jyldyń júzi boldy. Tipti, aýyl basshysy jergilikti arýlardyń ózge eldi mekenniń shylym shegetin jigitterine turmysqa shyǵýyna tyıym salǵan. Bul jaıynda "Ýmma-ınform" aqparat agenttigi habar taratty.
Temeki tútinine jany qas 350 turǵyny bar aýyl Túrkııanyń ońtústik-shyǵysyndaǵy Shanlyýrfa provıntsııasynda ornalasqan. 2008 jyly aýyl turǵyndary daýys berý arqyly shylym shegýden basy bútin bas tartqan bolatyn. Muslim.kz saıtynyń jazýynsha, osyǵan baılanysty bes jyl boıy bul eldi mekende temeki ónimderi satylmaıdy. El bıligi de aýyl turǵyndarynyń bul qadamyn quptap, marapattaǵan edi. Aýylǵa aparatyn kúre joldyń boıynda «Bizdiń aýylda shylymǵa jol joq» degen jazýdy kózińiz shalady.
Aýyl basshysy Abdolla Sachaklynyń sózine qaraǵanda, mundaı sheshimge kelýine aýyl turǵyndarynyń arasynda ókpe aýrýynyń órship ketýi sebep bolǵan. «Bastamany jastar kótergen bolatyn. Jat ádetke ábden boı aldyrǵan úlkendermen kúresý qıynǵa soqty. Dese de, ýaqyt óte kele jetistikke jettik. Qazirgi ýaqytta bizdiń aýylda birde-bir adamnyń shylym shekpeıtinin nyq senimmen aıta alamyn. Buǵan qosa, aýyl qyzdaryna shylym shegetin jigitke turmysqa shyǵýyna tyıym saldyq. Eger kúıeýi osynaý jat ádetke úıir bola bastasa, qyzymyzdy qaıtaryp alamyz. Kúıeýi jat ádetin qoımaıynsha, erine jibermeımiz»,- dedi aýyl basshysy.
