Túrkııadaǵy zilzalaǵa úsh jyl: qalpyna keltirý jumystary áli jalǵasyp jatyr

ASTANA. KAZINFORM – Túrkııanyń birqatar provıntsııalarynda jańa turǵyn aýdandaryn salý jumystary kezeń-kezeńimen aıaqtalyp keledi, dep habarlaıdy Kazinform-niń menshikti tilshisi.

2023 jylǵy 6 aqpanda bolǵan joıqyn jer silkinisterinen zardap shekken Elıazyg qalasynda Jappaı turǵyn úı qurylysy basqarmasy (TOKİ) salǵan 12 462 turǵyn úı zańdy ıelerine tolyqtaı tapsyryldy.

Epıtsentri Qahramanmarashta ornalasqan joıqyn jer silkinisterinen keıin Elıazyg qalasynda eleýli zaqymdar tirkelgen. 11 myńnan astam ǵımarat pen nysan turǵyndardyń ómir súrýine jáne paıdalanýǵa jaramsyz dep tanylyp, olardyń basym bóligi qazirdiń ózinde súrilgen.

Túrkııanyń Qorshaǵan orta, qala qurylysy jáne klımattyń ózgerýi mınıstrliginiń úılestirýimen júrgizilgen qalpyna keltirý jumystary aıasynda birneshe jyl boıy eldiń ońtústik-shyǵys provıntsııalarynda qala aýmaqtarynda da, aýyldyq jerlerde de jańa turǵyn úıler salyndy.

Elıazyg gýbernatory Nýman Hatıpoglýdyń aıtýynsha, qazirgi tańda zardap shekken otbasylardyń shamamen 95 paıyzy turǵyn úımen qamtamasyz etilgen.

– Qosymsha 2,4 myńnan astam turǵyn úıdiń qurylysy jalǵasyp jatyr, – dedi ol.

Jergilikti bılik ókilderi Elıazygtyń Túrkııa boıynsha seısmoturaqty ári zamanaýı qalalyq orta qalyptastyrýda aldyńǵy qatarǵa shyqqan qalalardyń birine aınalǵanyn atap ótti.

Buǵan deıin Túrkııanyń jer silkinisinen zardap shekken óńirlerinde turǵyn úı salý jáne olardy halyqqa tapsyrý jumystary jalǵasyp jatqany týraly habarlanǵan bolatyn.