Túrkııadaǵy jyljymaıtyn múlik satylymy rekordtyq kórsetkishke jetti

ASTANA. KAZINFORM — Túrkııanyń jyljymaıtyn múlik naryǵy 2025 jyly rekordtyq kórsetkishke qol jetkizip, tranzaktsııalar kólemi 3,3 mıllıon boldy, dep habarlaıdy Anadoly.

2024 jyldyń sáıkes kezeńderimen salystyrǵanda tranzaktsııalar sanynyń ósýi qańtar, aqpan, sáýir, mamyr, maýsym, shilde, tamyz, qyrkúıek jáne jeltoqsan aılarynda tirkeldi. Tómendeý tek naýryz, qazan jáne qarashada baıqalǵan.

Qańtar-jeltoqsan aralyǵynda jyljymaıtyn múlikti satý 8,7% ósip, 3 332 994 tranzaktsııany qurady, bul rekordtyq eń joǵary jyldyq kórsetkish. Buǵan deıingi rekord 2022 jyly ornatylyp, 3 234 200 tranzaktsııa jasalǵan.

Esepti kezeńde jer-kadastr organdary 20 mıllıonnan astam túrli operatsııalardy óńdedi. Onyń mańyzdy bóligi jyljymaıtyn múlikti satyp alý jáne satý boldy. Mámilelerdiń aıtarlyqtaı kólemi ıpotekalyq rásimder men múliktik quqyqtardy muraǵa qaldyrýmen baılanysty boldy. Sonymen qatar, kadastrlyq málimetterdi túzetý, memleket muqtajy úshin múlikti alyp qoıý, jyljymaıtyn múlikti bólý jáne biriktirý, syıǵa tartý, jer ýchaskelerin qaıta bólý júrgizildi.

Tirkeý jarnasynan túsken kiris 74,9 paıyzǵa artyp, 168 mıllıard 146 mıllıon 103 myń lıraǵa jetti, onyń 160,7 mıllıard lırasy jyljymaıtyn múlikti satyp alý-satý operatsııalarynan alyndy.

Buǵan deıin Túrkııada 24 mln adam baspana jaldap turýǵa májbúr ekenin jazǵan edik.

Sondaı-aq bul el jalǵan jyljymaıtyn múlikke qatysty 451 «altyn» tólqujatty qaıtaryp aldy. Sheshim shetel azamattaryna jalǵan jyljymaıtyn múlik satý arqyly azamattyq alý talaptaryn aınalyp ótýdi uıymdastyrǵan qylmystyq topty joıýǵa baǵyttalǵan aýqymdy arnaıy operatsııanyń nátıjesinde qabyldandy.