Túrkııadaǵy jańa EİDS júıesi: jyljymaıtyn múlik naryǵy qalaı ózgeredi

ASTANA.KAZINFORM -  7 sáýirden bastap Túrkııada jyljymaıtyn múlikti satý týraly habarlandyrýlardy tekserýdiń jańa júıesi kúshine enedi, dep habarlaıdy Kazinform agenttiginiń menshikti tilshisi.

Bul jańashyldyq Túrkııadaǵy turǵyn úı naryǵyn ózgertip, ony satyp alýshylar men satýshylar úshin ashyq ári qaýipsiz etýdi kózdeıdi. Jyljymaıtyn múlikti satý týraly habarlandyrýlardy tekserýdiń elektrondyq júıesi (EİDS) alaıaqtyq pen jalǵan habarlandyrýlardyń aldyn alý úshin engizilip otyr.

Endi jyljymaıtyn múlikti satý nemese jalǵa berý týraly habarlandyrýlardy tek menshik ıeleri nemese olardyń resmı senimdi tulǵalary ǵana ornalastyra alady. Ol úshin elektrondyq úkimet júıesi arqyly avtorızatsııadan ótý qajet, bul jalǵan usynystar men tıisti ókilettigi joq deldaldardyń paıda bolýyna jol bermeıdi.

Mamandardyń pikirinshe, EİDS engizilgennen keıin Túrkııadaǵy jyljymaıtyn múlik naryǵyndaǵy alaıaqtyq aıtarlyqtaı azaıady. Jalǵan habarlandyrýlar men negizsiz tómen baǵalar, kóbinese «kóleńkeli shemalarǵa» jáne satyp alýshylardyń qarjy joǵaltýyna alyp keletin jaǵdaılar sırek kezdesetin bolady.

Endi kez kelgen áleýetti satyp alýshy habarlandyrýlardyń zańdylyǵyna kóz jetkizip, barlyq qajetti aqparatty tikeleı menshik ıesinen nemese onyń senimdi ókilinen ala alady. Jańa júıe mámileler sapasyn baqylaýdy jaqsartyp, satýshy men satyp alýshy úshin táýekelderdi barynsha azaıtýǵa kómektesedi.

Buǵan deıin Túrkııanyń Saýda mınıstrligi avtokólik naryǵyndaǵy alaıaqtyq pen alypsatarlyqqa qarsy baǵyttalǵan satýshylardy tekserý júıesin (EİDS) engizgen bolatyn.

Keıin elde kýrerlerge arnalǵan jańa erejeler qabyldandy, al odan soń Túrkııada zańsyz jolaýshy tasymalyna qarsy qatań sharalar kúshine endi.

Aıta ketelik Túrkııa halqynyń 30%-dan astamy eski úılerde turady.