Túrkııadaǵy irikteý týrnıri: Dinmuhammed Qoshqar Olımpıada joldamasyna talasady

ASTANA. KAZINFORM – Túrkııanyń Stambýl qalasynda ótip jatqan kúres túrlerinen Olımpıadaǵa irikteý týrnırinde qazaqstandyq grek-rım sheberi Dinmuhammed Qoshqar Parıj olımpıadasynyń joldamasyna talasady.

67 keli salmaqta synǵa túsip jatqan otandasymyz birinshi jubanysh beldesýinde reseılik qarsylasy Aslan Vısaıtovtan basym tústi. Al ekinshi jubanysh beldesýinde Azııa chempıonatynyń qola júldegeri qytaılyq Leı Lıddi 10:0 esebimen taza utty.

Endi qazaqstandyq balýan Olımpıada joldamasyn sarapqa salatyn beldesýde egıpettik Mohammed Ibrahım Elsaıedpen beldesedi. 

Esterińizge sala keteıik, osyǵan deıin áıelder quramasy túgelimen qarsylastaryna jol berip, utylyp qalǵanyn jazǵan bolatynbyz.

Aıta keteıik, búgingi ýaqytta kúres túrlerinen Olımpıada oıyndaryna 7 joldama bar. Onyń 4-eýin grek-rım kúresiniń ókilderi ıelense, 3-eýi – erkin kúres sheberleriniń enshisinde. 

Ókinishke qaraı balýan qyzdarymyz áli birde-bir joldamaǵa qol jetkize alǵan joq.

Túrkııada ótip jatqan álemdik týrnırde ár salmaqtan úzdik úshtikke engen balýandarǵa Parıj Olımpıadasynyń joldamasy tabys etiledi.