Túrkııadaǵy orman órti birneshe aımaqty sharpydy
ASTANA. KAZINFORM – Túrkııanyń Izmır, Chanakkale, Aıdyn jáne Býrsa provıntsııalarynda ormandy dala aımaqtary órtenip jatyp. Órttiń jalpy aýmaǵy myń gektardan asady. Tilsiz jaýmen kóptegen tehnıka men órt sóndirý ushaqtary kúresýde.
Qala bıliginiń bir boljamy boıynsha, Izmırdegi órtke laqtyrylǵan temeki tuqyly sebep bolǵan. Túrkııanyń soltústik-batysyndaǵy Chanakkale provıntsııasynda da otqa abaısyz qaraý saldarynan órt shyqty. Aıdyn jáne Býrsa provıntsııalarynda órttiń shyǵý sebepteri áli anyqtalǵan joq. Eldiń basqa aımaqtarynda qatty aptap ystyqqa baılanysty órt shyǵý qaýpi saqtalýda.
Túrkııanyń Aýyl sharýashylyǵy jáne orman sharýashylyǵy mınıstrliginiń málimetinshe, Izmırde 16 orman órti tirkelgen. Órt Karakadag, Menderes, Menemen, Selchýk, Torbaly, Cheshme jáne basqa aýdandarda boldy. Eń kóp zardap shekken aımaqtar – Selchýk pen Menderes, munda jalyn qatty jelden tez taraǵan. Jalynmen kúreske 170-ten astam sý tasyǵysh kólik, qurylys tehnıkasy, 11 ushaq, 27 tikushaq, sondaı-aq 1 000-ǵa jýyq órt sóndirýshi men qarapaıym eriktiler jumyldyrylǵan.
Qaýipsizdik maqsatynda jekelegen aımaqtaǵy turǵyndar qaýipsiz jerge jetkizildi. Keıbir aýdandardaǵy órt pen qoıý tútinnen eki qonaqúı men birneshe úı turǵyndary evakýatsııalandy. Degenmen, jergilikti bılik ókilderiniń aıtýynsha, órtti sóndirý jumystary jaqsy júrgizilip jatyr.
Qazirgi ýaqytta Cheshme, Menderes, Menemen, Selchýk jáne Torbaly aımaqtarynda órtti oqshaýlaý jumystary jalǵasýda. Menderes óńirindegi orman alqabynda tutanǵan órtti áýeden sóndirýge arnaıy mashınalar men tehnıka jumyldyrylǵan.
Túrkııada jyl basynan beri barlyǵy 1 551 órttiń, onyń ishinde 880-nen astam orman órtinńǵ jáne 670-i aýylsharýashylyq órtiniń aldyn alý jumystary júrgizilgeni buryn habarlanǵan bolatyn.
